Qytetarë dhe aktivistë protestuan kundër ndërtimit të hidrocentraleve në lumenjtë e Shqipërisë duke kërkuar mbrojtje të mjedisit mbrëmjen e të mërkurës. Policia njoftoi se ka ndaluar dy prej tyre dhe ka proceduar 17 të tjerë për “miting të paligjshëm”.
Pasditen e së mërkurës, grupimi “Të mbrojmë lumenjtë” së bashku me ambjentalistë, qytetarë e aktivistë të shumtë marshuan në bulevardin Dëshmorët e Kombit për të ngritur zërin kundra fenomenit të ngritjes së HEC-ve në lumenjtë e Shqipërisë. Në përpjekje për të zhvendosur protestën përpara institucionit të Kryeministrisë ata u ndaluan prej forcave policore ku më pas edhe 13 prej aktivistëve u shoqëruan dhe u proceduan penalisht nga policia.
“Pushteti vendor dhe qëndror po kryen një masakër pasi kanë hyrë brenda parkut kombëtar dhe zonës së mbrojtur, kanë masakruar një pasuri kombëtare, të ardhmen e fëmijëve tonë, të ardhmen e turizmit, të gjitha gjallesat e kësaj zone, duke masakruar dinjitetin e të gjithë banorëve të zonës, pa marrë asnjë firmë, pa kryer asnjë matje të këtij lumi, pa marrë parasysh që është zonë e mbrojtur me ligj dhe devijojnë 2 lumenj nga rrjedha e tyre“, tha i indinjuar Dhimitër Koleci, i pranishëm në protestë dhe njëkohësisht banor i zonës Zall Gjocaj, zonë e rrezikuar prej HEC-eve.
Tashmë çështja e hidrocentraleve është kundërshtuar disa herë si nga organizatat mjedisore ashtu edhe nga banorët e komuniteteve të zonave rurale ku këto hidrocentrale ngrihen.
Sipas një studimi të publikuar pak ditë më parë prej organizatave mjedisore WWF Adria dhe Eco Albania dhe të kryer gjatë vitit 2019, rezulton se kosto ekonomike e ngritjes së këtyre hidrocentraleve nuk barazpeshon koston socio-ekonomike të komuniteteve, e si pasojë nuk justifikon sakrifikimin e natyrës shqiptare.
“HEC-virusi ka krijuar ka krijuar rreth 700 vatra infektive (HEC-e) nga Veriu ne Jug, po thithin lëngjet jetësore dhe po gjymtojnë e sakatojnë“, shkruhet në thirrjen e grupimit ‘Të mbrojmë lumenjtë”, referurar fenomenit të shkatërrimit të mjedisit nga hidrocentralet.
Flutura Doda, një banore nga fshatrat e Gjocajt, e pranishme në protestën e së mërkurës së bashku me vajzën e saj të vogël, është shprehur se HEC-i në Zall Gjocaj vijon punimet pasi gjykata i ka dhënë lejen, por atyre nuk u është paraqitur asnjë projekt.
“Ata po operojnë atje, por neve nuk kanë prezantuar asnjë projekt. Ne do vazhdojmë protestat tona”, u përgjigj Flutura për BIRN.
“Këtë ujë e kemi pirë gjithë jetën atje. Kanë prishur mullirin 2000 vjeçar në atë zonë dhe thonë nuk është prekur asgjë, ndërkohë që po bëjnë kërdinë atje. Nuk na japin asnjë dokument, asnjë sqarim, asnjë letër“, shtoi Koleci nga e njëjta zonë.
“Më kanë arrestuar me mijëra herë, dhe përse…se po mbroj një park kombëtar“, tha ai, duke parë përpjekjet e policisë për të shpërndarë protestën.
Policia ka ndërhyre disa herë edhe gjatë kësaj proteste për të shpërndarë të pranishmit, me pretekstin se tubime të tilla nuk janë të lejueshme nën kushtet e rritjes së kurbës së të infektuarve nga COVID-19 gjatë ditëve të fundit.
Policia e Shtetit deklaroi sot se gjatë kësaj proteste procedoi 13 persona, si organizatorë të tubimit tek Bulevardi “Dëshmorët e Kombit” pasi kanë organizuar dhe protestuar në mënyrë të paligjshme dhe pa lejen e organeve kompetente.
“Materialet për këto ngjarje do t’i kalojnë Prokurorisë së Rrethit Gjyqësor Tiranë, në ngarkim të personave të identifikuar si organizatorë, për veprat penale ‘organizim dhe pjesëmarrje në tubime të paligjshme’, ‘mosbindja ndaj urdhrit të punonjësit të policisë së rendit publik’, dhe ‘pengimi i qarkullimit të mjeteve të transportit’“, shkruhet në deklaratën e publikuar në faqen zyrtare në Facebook nga Policia e Shtetit.
Ndërkohë banorët e zonave te rrezikuara u shprehën të vendosur në kauzën e tyre.
“Ne jemi për mbrojtjen e lumenjve, për mbrojtjen e gjithë Shqipërisë, ka shumë lumenj që ju nuk i dini që po zaptohen, janë shumë, prandaj ju ftoj që të ngrihemi të protestojmë që këta të pangopur mos të na marrin dhe ata lumenj që na kanë ngelur“, deklaroi një banor i Mallakastrës gjatë protestës, duke iu referuar çështjes së Vjosës dhe zonave përreth të rrezikuara prej hidrocentraleve të tepërta.
“Ndaloni këtë masakër sa nuk është vonë, është pasuri kombëtare dhe nuk është park tregtar“, përfundoi Dhimitër Koleci.
