Me vota unanime gjyqtarja Albana Shtylla u zgjodh kryetare e Kolegjit të Posaçëm të Apelimit, pas mbarimit të mandatit të Natasha Mulajt.
Kolegji i Posaçëm i Apelimit njoftoi të martën rrotacionin në krye të tij. Sipas njoftimit për shtyp KPA zhvilloi seancën për zgjedhjen e kryetarit të ri Kolegjit të Posaçëm të Apelimit, me mandat nga 26 korriku i këtij viti deri më 26 korrik 2023. “Pas votimit të fshehtë që u zhvillua në prani të vëzhguesve ndërkombëtarë të Operacionit Ndërkombëtar të Monitorimit, rezultoi e zgjedhur me 7 (shtatë) vota pro, kandidatja Albana Shtylla”, njoftoi KPA.
Kolegji bëri me dije se Shtylla do të fillojë ushtrimin e detyrës së kryetares së Kolegjit të Posaçëm të Apelimit, pas mbarimit të mandatit të kryetares në detyrë Natasha Mulaj.
Shtylla, e cila ka lindur në Vlorë është diplomuar në Fakultetin e Drejtësisë, k mbajtur më herët një sërë detyrash publike si drejtuese në disa institucione, anëtare e Komisionit Qendror të Zgjedhjeve, anëtare e Këshillit të Lartë të Drejtësisë, si dhe Sekretares së Përgjithshme të Kuvendit të Shqipërisë.
