Antimafia në Itali dhe SPAK e policia shqiptare njoftuan arrestimin e 37 personave, sekuestrimin e 3.5 tonëve drogë të llojeve të ndryshme dhe sekuestrimin e dhjetra pasurive të një grupi të trafikut të narkotikëve me qendër në Vlorë dhe Bari.
Një operacion italo-shqiptar kundër trafikut të narkotikëve çoi të martën në arrestimin e 37 të dyshuarve në dy vendet dhe Francë si dhe në sekuestrimin e miliona eurove pasuri dhe drogë. Operacioni i koordinuar dhe financuar nga Eurojust dhe i zhvilluar nga Struktura e Posaçme Anti Korrupsion, Policia e Shtetit, Prokuroria e Antimafias në Bari, Guardia di Finanza dhe Karaninierët sollën 37 arrestime, 6 nga të cilat në Vlorë dhe sekuestrimin e 15 apartamenteve, një biznesi ushqimorë, një restoranti, një trualli ndërtimi, 7 makinave luksoze dhe një skafi, që dyshohet se i përkasin kreut të organizatës.
Policia shqiptare nuk i njoftoi zyrtarisht emrat e të arrestuarve, ndërsa komunikimi zyrtar i përfundimit të operacionit u bë përmes një konferencë të përbashkët nga Roma, ku ishin për vizitë edhe drejtuesi i SPAK Arben Kraja dhe Prokurori Vladimir Mara. Kraja dhe Mara vlerësuan bashkëpunimin, ndërsa drejtuesi i SPAK tha se do të hetoheshin edhe personat që kishin toleruar këtë rrjet të trafikut prej vitesh.
Në një komunikatë Eurojust që mbështeti operacionin e cilësoi atë një sukses ndërsa tha se ishin sekuestruar 40 milion euro drogë përfshi hashash, kokainë e heroinë. “Ky rezultat i qartë i hetimit i ekzekutuar në mënyrë simultane përtej kufijve u bë i mundur për shkak të Skuadrës së Përbashkët të Hetimit mes autoriteteve Shqiptare dhe Italiane, marrëveshja e të cilave është një bodel i bashkëpunimit mes Shqipërisë dhe autoriteteve gjyqësore të Bashkimit Europian”, thuhet në komunikatën e Eurojust.
Entuziast për operacionin ishte edhe ambasadori i BE në Tiranë Luigi Soreca, i cili e cilësoi atë në një twitter si “operacion brilant ndërkombëtar kundër trafikut të drogës”, ndërsa vuri në dukje se ky ishte prioritet për integrimin.
Po ashtu ministri i Brendshëm Sandër Lleshaj vlerësoi bashkëpunimin në një mesazh publik. “Operacioni i përbashkët italo-shqiptar dha sot një goditje shumë të fortë kundër krimit të organizuar në të dy brigjet e Adriatikut”, tha Lleshaj ndërsa u shpreh se ky ishte test i bashkëpunimit mes policisë dhe SPAK.
