Kryeministri Edi Rama përdori oratorinë e tij për të sulmuar Prokurorinë e Gjykatës Speciale të Kosovës me bazë në Hagë në një fjalim që zgjati më shumë se dy orë në Prishtinë duke e sharë atë si “portal” si dhe aktpadinë si “goditje brutale”, “e rëndë dhe e padrejtë” dhe “shkelje flagrante” e të drejtave të njeriut.
Kryeministri i Shqipërisë Edi Rama ofroi mbështetjen e tij për presidentin e Kosovës Hashim Thaçi përmes një vizite dyditore në Kosovë dhe një konference për shtyp që zgjati më shumë se dy orë dhe që u mbajt në mjediset e aeroportit ndërkombëtar të Prishtinës.
Rama pretendoi se vendi gjendet në një situatë të vështirë përballë së cilës shqiptarët duhet të bashkohen ndërsa sulmoi si “naivë” dhe “të verbër” ata që mendojnë se ndërkombëtarët po ndihmojnë Kosovën të shpëtojë nga “kapësit” e shtetit.
Rama ka ndërhyrë në mënyrë energjike në skenën politike të Kosovës, e cila është trazuar përgjatë viteve të fundit nga spekulimet për një plan paqeje me Serbinë që përfshin ndryshim kufijsh dhe asaj që prokuroria speciale e Hagës cilësoi si “përpjekje për të zhbërë gjykatën speciale”.
Zyra e prokurorisë së Gjykatës Speciale të Kosovës me bazë në Hagë publikoi të mërkurën e kaluar një njoftim të shkurtër në të cilin bëri të ditur publikisht se ka dorëzuar aktakuzë në gjykatë ndaj Presidentit të Kosovës Hashim Thaçi, politikanit Kadri Veseli e personave të tjerë nga radhët e Ushtrisë Çlirimtare të Kosovës, duke i akuzuar ata për krime lufte. Aktakuza është dorëzuar në gjykatë në prillin e kaluar dhe një gjyqtar është duke e vlerësuar atë paraprakisht por prokuroria bëri të ditur se kishte vendosur të publikonte lajmin për shkak se sipas saj, Thaçi ka punuar për ta zhbërë gjykatën speciale të Hagës.
“Z. Thaçi dhe z. Veseli besohet se kanë ndërmarrë një fushatë sekrete për të anuluar ligjin që krijon gjykatën dhe për ta penguar punën e Gjykatës në përpjekje për t’u siguruar se nuk do të përballen me drejtësinë,” deklaroi prokuroria në njoftim.
Njoftimi i saj erdhi pak ditë para një takimi të planifikuar në Uashington me ndërmjetësimin e administratës së Presidentit Trump mes Kosovës dhe Serbisë për një marrëveshje finale mes Serbisë dhe Kosovës. Aludohet se përmes një marrëveshjeje të tillë, Thaçi do të kishte mundësi të shfuqizonte ligjin e parlamentit të Kosovës që autorizon funksionimin e gjykatës speciale.
Pas shpalljes së njoftimit, takimi i planifikuar u anulua.
Kryeministri Edi Rama sulmoi në veçanti publikimin e njoftimit.
“Nëse do ishte aktakuza unë nuk do të isha këtu sot, s’do flisja në parlament dhe besoj se si çdokush tjetër, pavarësisht se çfarë do të mendoja do të isha i detyruar të prisja me durim procesin, po unë s’po flas për aktakuzën, po flas për një fletërrufe, një brutalitet ndërkombëtar,” deklaroi Rama në Prishtinë.
“…institucioni të bëhet portal? Është shkelje flagrante e lirive dhe të drejtave të njeriut, ka një implikim shumë më të thellë sepse nuk goditet një njeri i zakonshëm por goditet kryetari i një shteti sovran dhe goditet drejtimi i lartë politik i UÇK-së,” shtoi Rama.
Kosova autorizoi në vitin 2015 krijimin e një gjykate speciale për krime lufte dhe krime kundër njerëzimit që dyshohet se kanë ndodhur në kohën e Luftës së Kosovës dhe periudhën menjëherë pas saj.
Kryeministri Edi Rama ka hedhur në gjyq në janar të këtij viti ish-kryeministrin e Kosovës Ramush Haradinaj pasi ky i fundit akuzoi Ramën dhe Thaçin se kishin në plan të shkëmbenin territore me Serbinë duke “falur Trepçën”, një zonë minerare në veri të Kosovës. Rama pretendon se akuzat e Haradinajt për tradhëti kombëtare përbëjnë shpifje dhe kërkoi të drejtën e tij në gjykatën e Prishtinës.
Haradinaj, i cili e ka konsideruar padinë për shpifje si një “fshehje pas dramave mediale” dhe diversion politik nga Rama, refuzoi kërkesën e këtij të fundit për t’u takuar në Prishtinë të hënën më 29 qershor. Rama, i cili ka dy dyzina gjyqesh për shpifje aktualisht në proces, deklaroi se kishte vendosur të tërhiqej nga ky pretendim ndaj Haradinajt. Rama sugjeroi se po e tërhiqte padinë për shkak të nevojës për bashkim kombëtar përballë aktakuzës së Hagës.