Presidenti Hashim Thaçi, një ish-lider i Ushtrisë Çlirimtare të Kosovës, u mor në pyetje nga prokurorët e Hagës, të cilët tashmë kanë përgatitur një aktakuzë që e akuzon atë për krime lufte.
Presidenti i Kosovës Hashim Thaçi u mor në pyetje në Hagë të hënën nga Zyra e Prokurorit të Specializuar, e cila po heton krimet e kryera gjatë dhe pasluftës.
Zyra e Prokurorit të Specializuar njoftoi më 24 qershor se ka një aktakuzë të pakonfirmuar që akuzon Thaçin, si dhe Kadri Veselin dhe ish-luftëtarët e tjerë të Ushtrisë Çlirimtare të Kosovës, për krime lufte dhe krime kundër njerëzimit.
“Askush nuk mund të rishkruajë historinë. Ky është çmimi për lirinë”, tha Thaçi teksa mbërriti për t'u marrë në pyetje nga prokurorët.
Nëse aktakuza konfirmohet nga një gjykatës, Thaçi do të gjykohet në Dhomat e Specializuara të Kosovës në Hagë. Ai ka mohuar çdo keqbërje dhe ka thënë se do të tërhiqet nga posti i presidentit nëse gjykohet.
Një grup i vogël shqiptarësh protestuan ndaj aktakuzës para ndërtesës së Dhomave të Specializuara të hënën, duke mbajtur pankarta ku shkruhej “Ky është racizëm”, duke kënduar këngë dhe duke brohoritur “UÇK”.
Veseli, i cili është kryetari i Partisë Demokratike të Kosovës, PDK, shkroi në Facebook të hënën se Thaçi është “vëllai i tij nga lufta” dhe deklaroi se “beteja e tij për Kosovën do të jetë triumfuese”.
Ramush Haradinaj, një ish-kryeministër i Kosovës i cili dha dorëheqjen në vitin 2018 pasi u thirr për t'u marrë në pyetje si dëshmitar nga prokurorët e Kosovës, e përgëzoi gatishmërinë e Thaçit për t'u marrë në pyetje.
“Në çdo rrethanë përgjatë tërë historisë, kemi dëshmuar pjekuri, guxim, mikpritje e bashkëpunim, e këtë e dëshmon edhe gatishmëria jonë anipse nga pozita e viktimës, t'i përgjigjemi thirrjeve të drejtësisë sado të pa drejta qofshin ato”, shkroi Haradinaj në Facebook të hënën.
Më shumë se 100 ish-luftëtarë të tjerë të Ushtrisë Çlirimtare të Kosovës janë marrë në pyetje nga prokurorët e Hagës, të cilët po hetojnë akuza që përfshijnë vrasje, tortura dhe ndalime të paligjshme.
Zyra e Prokurorit të Specializuar tha se i bëri publike muajin e kaluar akuzat kundër Thaçit dhe Veselit sepse pretendonte se ata ishin të përfshirë në “një fushatë të fshehtë për të rrëzuar ligjin për krijimin e gjykatës dhe për të penguar kështu punën e gjykatës në përpjekje për të siguruar që ata të mos përballeshin me drejtësinë”.
Dhomat e Specializuara të Kosovës dhe Zyra e Prokurorit të Specializuar janë pjesë e sistemit gjyqësor të Kosovës, por ndodhen në Holandë dhe përbëhen nga një ekip ndërkombëtar.
Ato u ngritën me presionin e aleatëve Perëndimorë të Kosovës, të cilët druheshin se sistemi gjyqësor i Kosovës nuk ishte aq i fuqishëm sa të gjykonte çështje kaq të ndjeshme.
E ashtuquajtura “Gjykatë Speciale”nuk simpatizohet nga shqiptarët e Kosovës, të cilët e shohin atë si një fyerje për luftën çliruese të UÇK-së nga sundimi serb.
