Nëpërmjet një projekti për forcimin e vlerave dhe parimeve europiane tek të rinjtë në Shqipëri, 11 të rinj aktivistë nga qytete të ndryshme të vendit tonë patën mundësinë të ndajnë me njëri tjetrin dhe me publikun disa histori suksesi dhe mesazhe drejtuar institucioneve shtetërore duke u kërkuar atyre të bëjnë hapa konkretë drejt plotësimit të ëndrrës europiane të rinisë në vendit tonë.
Paraditen e së enjtes, të rinj aktivistë u mblodhën në një takim virtual në finalizim të projektit “Të rinjtë për një Shqipëri Europiane”, i cili synonte për të ndarë vlerat e Bashkimit Europian në komunitete të ndryshme nga Veriu në Jug të vendit, me qëllim marrjen e veprimeve konkrete për vlerat e një Shqipërie me standarte europiane.
Nëpërmjet këtij prezantimi, pjesëmarrësit shprehën mesazhin kryesor se ata duan që vendi i tyre të jetë pjesë e BE-së, në mënyrë që ata të kenë të njëjtat të drejta dhe mundësi si bashkëmoshatarët e tyre në vendet e Europës.
“Si mund të jemi ne pjesë e një ndryshimi kur të gjitha ato që themi mbeten vetëm në pankarta apo në letra? Të luftosh diskriminimin dhe korrupsionin do të thotë të krijosh parime të Bashkimit Europian. Ne si të rinj kemi forcën dhe energjinë ta ndryshojmë këtë sistem“, tha Sidorela Daci, nje studente 15-vjeçare nga Durrësi.
Ajo tha se korrupsioni dhe diskriminimi janë dy nga vlerat më negative të përhapura në shoqëri, dhe të rinjtë kanë pranuar që janë prekur nga këto fenomene në disa raste të ndryshme.
Sidorela pranoi aspiratat e saj dhe të bashkëmoshatarëve për hapjen e shoqërisë në mënyrë që të pranohet diversiteti.
“Shohim që kohët e fundit diskriminimi është përhapur shumë nëpër shkolla dhe nxënësit po paragjykohen nga mënyra sesi po vishen, nga prejardhja, nga feja, nga aparenca fizike, etj“, shtoi Sidorela, duke theksuar se ky fenomen negativ duhet luftuar.
Projekti për Shqipërinë Europiane përfshiu në total rreth 900 të rinj nga 11 rajone të Shqipërisë, të cilët për 20 muaj u përfshinë në zbatimin e aktiviteteve të ndryshme me mbështetjen e World Vision Albania dhe disa organizatave të tjera të shoqërise civile për promovimin e vlerave të demokracisë dhe shtetit të së drejtës.
“World Vision Albania do vazhdojë të punojë fort me grupet informale të të rinjve me familjet tuaja në komunitetet tuaja dhe thirrja ime është për çdo organizatë të shoqërisë civile, institucion, donator që së bashku të ringrejmë Shqipërinë në aspektet që është goditur më shumë si në ekonomi, shërbime shoqërore, arsim “, u shpreh ndër të tjera, drejtoresha e World Vision Albania, Eljona Boçe Elmazi.
Një tjetër student dhe pjesëmarrës i projektit, Shefqet Hoxha nga Vlora, u shpreh mbi institucionet dhe parimet demokratike duke theksuar se demokracia është shpresa e fundit për të rinjtë shqiptarë , dhe u bëri thirrje të gjithë institucioneve shqiptare t’i japin fund korrupsionit dhe padrejtësive.
“Suksesi i demokracisë varet prej institucioneve të saj“, tha Shefqeti. “Të mbjellim shpresën tek të rinjtë të cilët e shohin të ardhmen e tyre larg vendit, ndaj thirrja jonë është të hapen vende pune dhe të nxiten sipërmarrje për ata të rinj që aspirojnë arsimin gjatë gjithë jetës, punësimin, artin, sportin, kulturën etj”, vijoi ai.
Gjatë prezantimit në fokus u vu edhe rëndësia e shoqërisë civile në përpjekjet për ndryshime pozitive të shtetit të së drejtës.
“Shpesh politika dhe strategjitë në vendin tonë ndryshojnë, ndoshta jemi ne ata rebelët që me zemër dhe me pasion do ta bëjmë Shqipërinë një vend më të mirë nëse do të na jepej mundësia neve të rinjve të ishim pjesë e shoqërisë civile “, tha Kristi, një tjetër pjesmarrëse e projektit, duke shtuar se ata janë brezi që do sjellë ndryshimin pasi janë gati për Shqipërinë Europiane.
“Koha është tani. Rinia ka forcën dhe ëndrrën që akoma gjërat mund të ndryshojnë në Shqipëri“, përfundoi Kristi, nga qyteti i Korçës.