Policia e Shtetit arrestoi Bujar Sejdinajn gjatë një operacioni ndërkombëtar të shtrirë edhe në Itali, Argjentinë dhe Costa Rica për akuza që lidhen me trafikun ndërkombëtar të lëndëve narkotike.
Një operacion i zhvilluar paralelisht në Shqipëri, Itali, Argjentinë dhe Costa Rica u finalizua të premten me arrestimin e 6 personave të dyshuar si pjesë e organizatës mafioze “Ndrangheta” në trafikun ndërkombëtar të lëndëve narkotike.
Sipas njoftimit zyrtar të policisë, në pranga përfundoi edhe Bujar Sejdinaj me vendbanim në Tiranë, i cili akuzohet se është përfaqësues i “Ndrangheta”-s në Shqipëri dhe në Ballkan.
“…U kap dhe u arrestua me qëllim ekstradimi shtetasi B. S., i quajtur ‘Xhaxhai', përfaqësuesi i Ndrangheta-s në Shqipëri dhe në zonën e Ballkanit dhe në veçanti përfaqësuesi i familjes mafioze “Bellocco”. Shtetasi B. S. ka marrë pjesë në blerjen e rreth 20 kg kokainë në Spanjë,” deklaroi Policia.
Si i dyshuar për përfshirje në këtë organizatë kriminale është ndaluar më 26 maj 2020 edhe Ardian Cekini, banues në Elbasan.
Në të njëjtën kohë në Argjentinë janë arrestuar tre persona; një korrier me inicialet F.S dhe njeri i besuar i Ndrangheta-s, i cili akuzohet se bënte lidhjen mes Amerikës së Jugut dhe Kalabrisë që kryente transportin e dokumenteve sekrete; G. P., lindur në Romë e banues në Buenos Aires i dyshuar se kryente lidhjet midis furnizuesve të drogës të Amerikës së Jugut dhe familjeve mafioze italiane, si dhe argjentinasi F. P., i ndaluar edhe një vit më parë, i cili kujdesej për të anashkaluar kontrollet doganore dhe për pastrimin e parave.
Në Costa Rica, në qytetin Jaco është arrestuar F.D, lindur në Itali, bashkëpronar i një hoteli Casino pasi dyshohet se bënte të mundur dërgimin e kokainës në Itali, si dhe u siguronte anëtarëve të organizatës bazën logjistike dhe akomodimin në Amerikën Latine.
Në njoftim thuhet se ky operacion është kryer në kuadër të një projekti ndërkombëtar policior në 30 vende të botës ku ka ndikim “Ndrangheta”.