Astrit Beqiri, pronari i një pularie dhe shumë pronave të tjera në Shkodër, u dërgua për gjykim nën akuzën se përmes këtyre aktiviteteve pastronte paratë e fituara nga kunati Jetmir Kastrati në trafikun e drogës në Danimarkë. Bashkë me të nën akuzë është edhe Dhimitri Shkodrani, i cili kryente kalimin e parave nga Maqedonia për në Shqipëri.
Dy shtetas shqiptarë që dyshohet se kanë pastruar në Shqipëri paratë e fituara nga një bandë e trafikut të kokainës në Danimarkë, e cila u godit vitin e kaluar nga autoritetet daneze. Prokuroria e Posaçme Kundër Krimit të Organizuar dhe Korrupsionit, SPAK, bëri të ditur të martën se dosja hetimore e Astrit Beqirit dhe Dhimitri Shkodranit u dërgua në gjyq.
Beqiri, 51 vjeç, është arrestuar në qershor 2019 pasi autoritetet daneze goditën organizatën e kunatit të tij, Jetmir Kastrati, i cili njihet në Danimarkë edhe si Sokol Krasnici. Autoritetet daneze thonë se organizata e përbërë kryesisht nga shqiptarë, ishte përgjegjëse për trafikimin e së paku 1650 kilogramëve kokainë dhe heroinë. Sipas skemës së zbarthur nga autoritetet e Danimarkës, Norvegjisë dhe Shqipërisë, fitimet e trafikut dërgoheshin në qytetin e Tetovës në Maqedoninë e Veriut përmes një linje të transportit të udhëtarëve me autobuz të quajtur “Alba Trans”, para se të transportoheshin për në Shqipëri nga shtetasi Dhimitri Shkodrani.
Pularia RENS 2015, një kompani me kapital të regjistruar prej 42 milionë lekësh, nën pronësinë e Beqirit, u sekuestrua nëntorin e kaluar ndërsa Beqirit iu sekuestruan edhe gjashtë apartamente në Velipojë, dhe disa apartamente.
