Gjykata e Posaçme e Apelit i dha të drejtë shkallës së parë për sekuestrimin e pasurive të Ylli Ndroqit, ndërsa avokatët e tij e konsideruan vendimin të pabazuar dhe paralajmëruan rekurs në Gjykatë të Lartë.
Gjykata e Posaçme e Apelit për Korrupsionin dhe Krimin e Organizuar vendosi të enjten të lërë në fuqi vendimin e shkallës së parë për sekuestrimin e pasurive të Ylli Ndroqit, mes të cilave edhe dy kompanitë që menaxhojnë televizionet “Ora News” dhe “Channel One” në pronësi të tij.
“U vendos miratimi i vendimit nr.16 datë 1 gusht 2020 i Gjykatës së Posaçme të Shkallës së Parë për Korrupsionin dhe Krimin e Organizuar”, i tha BIRN gjyqtarja për mediet pranë Gjykatës së Posaçme të Apelit, Saida Dollani. Trupi gjykues i Apelit përbëhej nga gjyqtarët Albana Boksi, Nertina Kosova dhe Dhimitër Lara.
Pas vendimit, përfaqësuesi ligjor i Ndroqit, avokati Alban Qafa e quajti të padrejtë vendimin e Gjykatës së Posaçme të Apelit dhe tha se do të ushtrojnë rekurs në Gjykatën e Lartë.
“Dua të theksoj se ky vendim nuk është i mbështetur në prova. Prokuroria ka sjellë indicie, ne kemi dorëzuar prova. Edhe ato prona që janë përfituar me ligjin 7501, me privatizim nga komunalja, prona që janë të kredituara…, të gjitha qëndrojnë të sekuestruara megjithëse ecën kredia e tyre dhe ecën qiraja financiare,” tha Qafa për gazetarët.
Avokatët e Ndroqit ngritën gjithashtu dyshime se indiciet janë prodhuar nga Ministria e Brendshme dhe jo nga Prokuroria, ndërsa pretendoi se Ndroqi nuk ka qenë asnjëherë i proceduar apo i arrestuar në Itali.
“Edhe përsa i përket rastit të Turqisë, z.Ndroqi ka patur verifikim të nje celulari ‘Ericsson’ që është marrë dhe është çuar në laboratorin e policisë shkencore atje. Nuk ka asnjë dënim, edhe në dosjen e gjykatës apo në fshikullin e prokurorit në Turqi për z.Ndroqi,” shtoi avokati Qafa.
Më 3 gusht 2020, SPAK deklaroi se Ylli Ndroqi alias Xhemail Pasmaçiu është subjekt i ligjit “Antimafia” dhe se “perandoria” e biznesit të tij dyshohet se i ka rrënjët tek përfshirja në të shkuarën në trafikun e drogës në Shqipëri, Turqi dhe Itali.
“Ekzistojnë prova konkrete se [pasuritë ] janë të pajustifikuara. Duke u krahasuar vlera e tyre me të ardhurat e fituara në rrugë të ligjshme, rezulton se vlera e tyre nuk iu përgjigjet dukshëm nivelit të të ardhurave dhe të fitimeve të realizuara në rrugë të ligjshme,” thuhej në njoftimin e SPAK.
Hetimi pasuror për Ylli Ndroqin është regjistruar më 21 korrik 2020 në bashkëpunim edhe me Policinë e Shtetit. Ndërsa më 1 gusht, Gjykata e Posaçme vendosi sekuestrimin e 10 pasurive të patundshme, 5 automjeteve luksoze, mes të cilave dy me targa diplomatike, si dhe aksionet e 11 kompanive në pronësi të Ylli Ndroqit dhe bashkëshortes së tij, Mimoza Ndroqi.
Sipas SPAK, Ndroqi –i njohur më parë me emrin Xhemail Pasmaçiu është arrestuar në shtator 1998 në Turqi në kuadër të operacionit “ESAS” për trafik ndërkombëtar lëndësh narkotike, ndërsa në vitin 2004, autoritetet italiane e kanë referuar Ndroqin tek autoritetet gjyqësore si organizator i trafikut të drogës për llogari të një grupi kriminal të përbërë kryesisht nga shtetas shqiptarë.
