Tri blloqet opozitare që fituan një shumicë minimale në zgjedhjet e së dielës deklaruan se “qeveria e ekspertëve” që do të krijohet prej tyre, do të zbatojë reformat e nevojshme për integrim të Malit të Zi në Bashkimin Europian sa më parë të jetë e mundshme.
Udhëheqësit e tre partive të opozitës që dolën fituese me rezultat të ngushtë në zgjedhjet e së dielës në Malin e Zi njoftuan të hënën se ata nuk do të ndryshojnë drejtimin e vendit për anëtarësim në Bashkimin Europian.
Pas takimit të tyre, Zdravko Krivokapic, udhëheqës i Aleancës për të Ardhmen e Malit të Zi, Dritan Abazovic nga koalicioni Bardh e Zi dhe Aleksa Becic nga koalicioni Paqja është Kombi Ynë thanë se një maxhorancë e re qeverisëse do të zbatojë të gjitha angazhimet ndërkombëtare me përgjegjësi.
“Qeveria e re do të zbatojë të gjitha reformat e nevojshme në mënyrë që Mali i Zi të anëtarësohet në Bashkimin Europian sa më parë të jetë e mundshme. Një qeveri demokratike do të ndërtohet me persona që janë ekspertë në fushat përkatëse, pavarësisht tipareve të tyre politike, fetare, kombëtare apo të tjera,” thanë udhëheqësit në një deklaratë të përbashkët.
Sipas Komisionit Shtetëror të Zgjedhjeve, partitë e opozitës fituan një shumicë të lehtë me 41 mandate në parlamentin me 81 vende.
Koalicioni kryesisht proserb E Ardhmja e Malit të Zi fitoi 35.5% të votave dhe 27 deputetë. Paqja është Kombi Ynë fitoi 12.5% të votave dhe dhjetë mandate ndërsa koalicioni Bardhë e Zi fitoi 5.5% të votave dhe katër mandate.
Partia Demokratike e Socialistëve e Milo Gjukanovicit, e cila ka qeverisur Malin e Zi që prej tre dekadash, fitoi 35.12% të votave dhe 30 nga 81 vendet në parlament.
Partia e Gjukoanoviçit dhe aleatët e tij tradicionalë kanë aktualisht 40 mandate, një më pak se sa shumica e thjeshtë. Ish partnerët e tij nga blloku i partive kroate nuk e kaloi dot pragun elektoral.
Daliborka Uljarevic, nga Qendra për Edukim Civil, shprehu rezerva për “qeverinë e ekspertëve” duke argumentuar se udhëheqësit e opozitës duhej të tregonin se merrnin përgjegjësinë. “Ti mund të përcaktosh ekspertë të caktuar në departamente të caktuara, por janë udhëheqësit politikë ata që duhet të drejtojnë qeverin,” komentoi ajo për TV Vijesti.
Pavarësisht se të tre blloqet opozitare kanë të përbashkët dëshirën për të rrëzuar nga pushteti partinë e Gjukanovicit, ato nuk kanë gjëra të tjera të përbashkëta. Disa janë pro-BE dhe pro-NATO, të tjerë janë anti-NATO dhe besnikë ndaj Kremlinit.
Koalicioni Për të Ardhmen e Malit të Zi dominohet nga Fronti Demokratik, një parti proserbe e drejtuar nga Krivokapic, e cila kundështoi ashpër anëtarësimin e Malit të Zi në NATO dhe kërkon lidhje më të ngushta me Rusinë ndërsa lëvizja liberale Bardhë e Zi është pro-BE-së.
Mbështetësit e opozitës vijuan të festojnë në disa qyteza të Malit të ZI të hënën, duke hedhur slogane kundër Gjukanoviçit dhe duke mbajtur flamuj të Malit të Zi dhe të Serbisë.
Media vendëse raportoi disa përplasje mes mbështetësve të opozitës dhe qeverisë në kryeqytetin Podgoricë dhe në qytezat e Pljevljas dhe Nikshiçit. Policia ndërhyri në Podgoricë për të ndaluar sherrin.
Media raportoi gjithashtu edhe provokime etnike kundër boshnjakëve në qytezën e Pljevljas dhe kundër shqiptarëve në Tuz ndërsa Partia Demokratike e Socialistëve bëri thirrje për të ndaluar incidente të tilla dhe për të ruajtur paqen.
Të martën, udhëheqësi i Aleancës për të Ardhmen Zdravko Krivokapic i bëri thirrje mbështetësve të vet të qëndronin në shtëpi dhe të ndërprisnin festimet në rrugë. Ai i bëri thirrje autoriteteve të hetonin incidentet dhe të ndiqnin penalisht sulmuesit.
“Nëse ne vijojmë me ndasitë, mund të kemi probleme shtesë. Opozita nuk dëshiron të ketë probleme të tilla, është koalicioni në qeveri që ka nevojë për tensione për të ruajtur pushtetin. Ne nuk duhet të reagojmë përballë provokimeve,” tha Krovokapic për TV Vijestin. “Askush nuk duhet të jetë i rrezikuar në Malin e Zi. Në veçanti minoritetet kombëtare,” shtoi ai.
