Lockheed Martin, prodhuesi i helikopterëve të famshëm Balc Hawk, vendosi të hapë një qendër për mirëmbajtjen e helikopterëve në territorin e Rumanisë, duke fuqizuar në këtë mënyrë rolin e Rumanisë në strategjinë e mbrojtjes së Europës.
Qeveria e Rumanisë përmes prodhuesit të vet të mjeteve ajrore ROMAERO të enjten nënshkroi një marrëveshje me degën polake të gjigandit amerikan të mbrojtjes Lockheed Martin për hapjen e një qendre për mirëmbajtjen e helikopterëve të modelit Black Hawk në Rumani.
Lidhja e kontratës u njoftua nga Ministria e Ekonomisë së Rumanisë dhe Ambasada e SHBA-së në Bukuresht, e cila e përshëndeti marrëveshjen si një gur kilometrik në marrëdhëniet mes dy vendeve dhe aleancës së SHBA-së me Poloninë.
“Për të ruajtur dhe mbrojtur lirinë dhe demokracinë përballë ndikimeve dashakeqe ruse, kineze apo të tjera, është e me rëndësi vendimtare të mbajmë ekonomi të gjalla po aq shumë sa edhe forca ushtarake efikase,” deklaroi ambasadori i SHBA-së në Rumani Adrian Zuckerman, pas nënshkrimit të marrëveshjes.
Projekti “do të fuqizojë kapacitetet ushtarake të të gjitha vendeve Europiane dhe do të kontribuojë në ekonomitë e Rumanisë dhe Polonisë,” shtoi ai.
Qendra e mirëmbajtjes do të jetë në Bukuresht dhe “do të bëhet bazë për operacionet përmes të cilave ROMAERO në të ardhmen mund të shërbejë flotën e helikopterëve shumërolësh Black Hawk të blerë nga ana e qeverisë së Rumanisë”. Qendra do të japë shërbime mirëmbajtjeje edhe për helikopterët e këtij lloji që janë nën pronësinë e vendeve të tjera aleate.
Marrëveshja për qendrën e mirëmbajtjes është realizuar ndërkohë që kompania e aeronautikës PZL Mielec, që është edhe dega polake e Lockeed Martin, i ka ofruar qeverisë së Rumanisë 12 helikopterë Black Hawk, të cilat mund të përdoren në misione civile.
Hapja e qendrës së mirëmbajtjes varet edhe nga rezultati i një tenderi për blerjen e helikopterëve nga Ministria e Brendshme e Rumanisë ndërsa kjo mund t’i hapë rrugën blerjes së helikopterëve ushtarakë nga Ministria e Mbrojtjes.
Që nga viti 2014 kur Rusia pushtoi gadishullin e Krimesë në Ukrainë, Rumania, një vend ish-komunist që u anëtarësua në NATO më 2004 është bërë një faktor i rëndësishëm në strategjinë mbrojtëse të SHBA-së përballë Rusisë.
Presidenti Donald Trump vendosi pak kohë më parë që një pjesë e trupave amerikane të vendosura në Gjermani të transferohen për në Poloni dhe Rumani, për t’iu kundërvënë ndikimit të Rusisë në këtë pjesë të Europës.
“Kjo nuk është një marrëveshje rutinë biznesi,” deklaroi ambasadori i SHBA-së Zuckerman, në lidhje me pasojat gjeopolitike të memorandumit të nënshkruar nga Lockeed Martin në Rumani.
Ai iu referua Rumanisë dhe Polonisë si “shtyllat e mbrojtjes së krahut lindor të Euroopës” nga agresioni Rus. Ambasadori rikujtoi afërsinë e bazave ushtarake të Rusisë në Derin e Zi dhe përmendi një incident të kohëve të fundit si një shembull të llojit të tensioneve në rajon.
“Të premten e kaluar mbi Derin e Zi, avionët rusë në mënyrë agresive dhe të rrezikshme ngacmuan një avion amerikan në hapësirën ajrore ndërkombëtare. Ata rrezikuan pa ndonjë arsye jetët e ekuipazheve tona,” deklaroi Zuckerman.
