Një inspektor i Drejtorisë së Përgjithshme të Tatimeve u arrestua nga policia nën akuzën se shantazhonte bizneset duke i kërkuar shuma të konsiderueshme nën kërcënimin e inspektimit tatimor.
Policia bëri të ditur se inspektori me inicialet E.T., 37 vjeç, u kap me 5 mijë euro të marra nga një biznes privat. Drejtoria e Përgjithshme e Tatimeve lavdëroi policinë dhe njoftoi se e ka shkarkuar inspektorin në fjalë nga puna. E. T. punonte në Drejtorinë e Hetimit Tatimor, njësisë kyçe të luftës kundër evazionit fiskal në vend që në këtë rast, ka funksionuar si zyrë shantazhi dhe zhvatjeje.
“…ky shtetas iu kërkonte dhe iu merrte shuma të konsiderueshme monetare subjekteve të ndryshme private, si këmbim për të mos i hetuar dhe mos i referuar në prokurori, kur këto subjekte konstatoheshin në shkelje,” bëri të ditur policia.
“Në cilësinë e provës materiale u sekuestrua shuma monetare prej 5000 eurosh, të cilën ky shtetas ia kishte marrë administratorit të një subjekti privat,” vijon më tej njoftimi.
Kjo nuk është hera e parë që zyrtarë tatimesh arrestohen pasi u kërkojnë para bizneseve. Në gusht, drejtori i tatimeve Korçë dhe një inspektor u arrestuan për të njëjtën arsye.
Në mënyrë të ngjashme, gjashtë oficerë policie u arrestuan në korrik në Korçë pasi u identifikuan si persona që kishin krijuar një rrjet zhvatjeje të qytetarëve gjatë rregullave të ashpra për qarkullimin rrugor të vendosura nga qeveria në kuadër të luftës kundër pandemisë së koronavirusit.