Policë të armatosur të EULEX-it bastisën Organizatën e Veteranëve të Luftës së Ushtrisë Çlirimtare të Kosovës dhe arrestuan kreun e saj, pasi ai i bëri thirrje mediave të publikonin dosjet e rrjedhura nga Gjykata Speciale në Hagë.
Njësitë speciale të policisë së EULEX arrestuan të premten kreun e Organizatës së Veteranëve të Luftës të Ushtrisë Çlirimtare të Kosovës, Hysni Gucati, në një mësymje në zyrat e organizatës në Prishtinë.
Avokati i Organizatës së Veteranëve të Luftës, Tome Gashi, tha se ai mendonte se Gucati do të transferohet në Dhomat e Specializuara të Kosovës në Hagë, e cila po merret me raste krimesh lufte të pretenduara se janë kryer nga guerilët e UÇK-së gjatë dhe pas luftës së Kosovës nga viti 1998 në vitin 2000.
“Tani kreu i Organizatës së Veteranëve të Luftës të UÇK-së, zoti Hysni Gucati, është arrestuar nga policia e EULEX-it dhe do të transferohet në Hagë! Bastisjet po vazhdojnë! ” shkroi Gashi në Facebook.
Sekretari i Organizatës së Veteranëve të Luftës, Faton Klinaku, pretendoi se një hetues nga Dhomat e Specializuara të Kosovës ishte me policinë e EULEX-it kur ata bastisën ndërtesën.
Klinaku tha gjithashtu për mediat se policia e EULEX-it nuk kishte urdhër.
BIRN kontaktoi EULEX-in dhe Zyrën e Prokurorit të Specializuar të Kosovës, por nuk mori asnjë përgjigje deri në kohën e publikimit.
Arrestimi i Gucatit vjen në mes të polemikave të vazhdueshme pasi Organizata e Veteranëve të Luftës së Ushtrisë Çlirimtare të Kosovës pretendoi se ka marrë në mënyrë anonime një sasi të madhe dokumentesh të rrjedhura nga prokurorët e Hagës këtë muaj.
Gucati i ka bërë thirrje mediave në Kosovë të publikojnë dokumentet pa zbuluar emrat e dëshmitarëve.
Deri më tani, mediat në Kosovë nuk kanë publikuar asnjë nga dokumentet, por stacioni televiziv shqiptar Top Channel ka publikuar ato që ai pretendon se janë pjesë nga aktakuza ndaj presidentit të Kosovës, Hashim Thaçi, ish-lideri politik i UÇK-së. Materiali nuk mund të verifikohej.
Zyra e Prokurorit të Specializuar të Kosovës të enjten arrestoi ish-oficerin e UÇK-së Salih Mustafa, i cili është paditur për krime lufte në vitin 1999.
Dhomat e Specializuara të Kosovës dhe Zyra e Prokurorit të Specializuar janë pjesë e sistemit të drejtësisë të Kosovës, por ndodhen në Holandë dhe kanë staf ndërkombëtar.
Ato u krijuan nën presionin e madh të aleatëve perëndimorë të Kosovës, të cilët druheshin se sistemi i drejtësisë në Kosovë nuk ishte aq i fuqishëm sa të gjykonte çështje kaq të ndjeshme dhe të mbronte dëshmitarët.
