SPAK ka marrë nën hetim zv/drejtorin e Operacionit Forca e Ligjit pasi dyshohet se ka nxjerrë informacione sekrete dhe ka kryer korrupsion. Gjykata e Posaçme ka pranuar kërkesën e SPAK për caktimin e masës së sigurisë “pezullim nga detyra”.
Gjykata e Posaçme për Korrupsionin dhe Krimin e organizuar, GjKKO ka vendosur të dielën më 27 shtator masën e sigurisë “pezullim nga detyra” për kreun e Operacionit Forca e Ligjit, OFL, Artan Shkëmbi për veprat penale “korrupsion pasiv i personave që ushtrojnë funksione publike” dhe “zbulimi i akteve dhe të dhënave sekrete”.
Drejtuesi i Prokurorisë së Posaçme Kundër Korrupsionit dhe Krimit të Organizuar, SPAK, Arben Kraja i tha BIRN të hënën se Artan Shkëmbi është person nën hetim për korrupsion dhe nxjerrje sekreti hetimor. Ai shtoi se gjykata e kishte pranuar kërkesën e SPAK për caktimin e masës së sigurimit për “pezullim nga detyra” të Shkëmbit. Sipas zëdhënësit të Policisë së Shtetit, Genti Mullai, është zbatuar vendimi i Gjykatës së Posaçme për pezullimin e Artan Shkëmbit nga detyra.
Shkëmbi u konfirmua në detyrë me shumicë votash më datë 28 shkurt 2020 nga Komisioni i Jashtëm i Kualifikimit, KJV që po kryen procesin e vetingut në polici. Kryesuesi Alban Laska dhe anëtarja Mirela Ujkani në shumicë votuan për konfirmimin në detyrë të Shkëmbit. Ndërsa relatori i çështjes Artur Baku, në pakicë shprehet në vendim se, Artan Shkëmbi duhej të ishte shkarkuar për shkak se nuk arriti nivel të besueshëm në kriterin e pasurisë.
Nga hetimi administrativ i KJV u identifikua edhe fakti se Shkëmbi ka qenë me detyrë funksionale Punonjës Operativ, Oficer në strukturat e ish Sigurimit të Shtetit nga data 1 gusht 1990 deri më 1 tetor 1991, pasi është diplomuar në vitin 1990 në Shkollën e Lartë të Ministrisë së Punëve të Brendshme, Dega Sigurim. KJV nuk e ka konsideruar penalizues këtë fakt, duke vlerësuar se periudha e ushtrimit të funksionit ka qënë e shkurtër dhe se nuk raportohen të dhëna për shkelje të drejtave dhe lirive themelore të njeriut nga ana e Shkëmbit.
Operacioni Forca e Ligjit nisi si një akt normativ, përputhshmëria e të cilit me Kushtetutën e Shqipërisë është vënë në pikëpyetje nga organizatat e shoqërisë civile dhe shumë ekspertë. Që nga krijimi në shkurt 2020, kjo njësi e policisë ka tërhequr vëmendjen e publikut për deklarata të njëpasnjëshme në të cilat është njoftuar dërgimi i formularëve të vetëdeklarimit të pasurisë të disa figurave të njohura apo të dyshuara për aktivitet kriminal. Ende nuk bëhet e ditur se çfarë efekti ka sjellë në luftën kundër krimit dërgimi i këtyre formularëve.
