Drejtuesi i një vinçi që punonte në një nga urat në rrugën e Arbërit, që po ndërtohet me koncesion nga kompania Gjoka Konstruksion vdiq pas një aksidenti në punë, rrethanat e të cilit janë ende në hetim.
Një 53 vjeçar humbi jetën në kantierin e rrugës së Arbërit. Ngjarja ka ndodhur paraditen e kësaj të mërkure në kantierin e ndërtimit të urës së fshatit Fshat. Sipas njoftimit të policisë, ngjarja ndodhi rreth orës 09.40. “Shtetasi A. A., rreth 53 vjeç, duke punuar me një automjet të rëndë (vinç) në urën e fshatit Fshat, Klos, është aksidentuar dhe për pasojë ka humbur jetën”, thuhet në njoftimin e Drejtorisë së Policisë Dibër.
BIRN, mësoi nga dëshmitarë që kërkuan të mos identifikoheshin, se vinçi ishte rrëzuar dhe bashkë me të edhe personi që po punonte.
Roland Kurti, Inspektor i Punës në Dibër i tha BIRN se ishte kërkuar ndalimi i punës në vendin e aksidentit deri në zbardhjen e ngjarjes, ndërsa tha se në hetim ishte për momentin kompania koncesionare Gjoka Konstruksion, ndërsa tha se nuk ishte e qartë nëse viktima punonte për këtë të fundit apo për ndonjë kompani të nënkontraktuar.
BIRN kontaktoi në telefon me përfaqësues dhe me sekretarinë e kompanisë “Gjoka Konstruksion” që po bën ndërtimin e rrugës së Arbërit, por deri në publikin e këtij lajmi nuk mori përgjigje.
Ura e fshatit Fshat, ura e dytë më e rëndësishme në rrugën e Arbërit. Sipas të dhënave në projektin e rrugës, kjo urë do të jetë 174 metër e gjatë dhe 157 metër lartësi.
Në qershor të vitit 2019-të një tjetër person humbi jetën në kantierin e rrugës së Arbërit, në fshatin Shkallë të Njësisë Administrative Xibër në Klos. Një banor i zonës u shtyp nga makineritë e rënda të firmës që punonin edhe natën, duke e mbuluar me dhe.
Ndërtimi i rrugës së Arbërit nëpërmjet formës koncesionare me Partneritet Publik-Privat me kompaninë “Gjoka Konstruksion” ka nisur që në vitin 2018-të. Sipas kontratës, të miratuar nga Këshilli i Ministrave, vlera e financimit të rrugës është 33.6 miliardë lekë, me të cilat do të financoheshin gjithsej 41 kilometra rrugë të kategorisë C , nga të cilat 26 do të bëheshin nga e para dhe 15 të tjera pjesërisht.
