Duke iu përgjigjur një pretendimi se në Serbi, deri në qershor 2020, vdiqën shumë me tepër njerëz nga COVID-19 sesa u raportua, presidenti Vuçiç ka premtuar një rishikim të shifrave – pasi kishte hedhur poshtë më parë raportet e BIRN për një ndryshim të madh midis shifrave reale dhe atyre zyrtare të vdekjeve.
Presidenti Aleksandër Vuçiç ka thënë se autoritetet serbe do të kryejnë “një rishikim të plotë të çdo vdekjeje” lidhur me COVID-19.
“Serbia do të bëjë një rishikim të plotë të çdo vdekjeje, të çdo personi, për të parë se si duket. Këtë do ta bëjnë punonjësit tanë”, tha Vuçiç të enjten, teksa vizitgonte vendin ku po ndërtohet një spital i ri COVID-19 në Beograd, njoftoi Televizioni N1.
Megjithatë, Vuçiç shtoi se ai nuk mendonte se rishikimi do të zbulonte ndryshime të mëdha në numra. Ai tha se autoritetet nuk i kishin fshehur asgjë publikut deri më tani dhe se do të punonjë në mënyrë kaq transparente edhe në të ardhmen.
Deklarata e tij erdhi pasi një anëtar i Shtabit të Krizave të Qeverisë Serbe, Predrag Kon, pranoi se numri i vdekjeve deri në qershor, i njoftuar zyrtarisht nga qeveria si i lidhur me COVID-19, ishte tre herë më pak se sa numri real.
Kon fajësoi sistemin e ri të informacionit për këtë gabim, duke thënë se ai ishte përdorur për herë të parë.
“Ne po e përdornim për herë të parë një sistem të tillë. Ai sistem informacioni, në një moment, në një kohë, nuk ishte mjaftueshëm i saktë dhe nuk mund të them përse. Kështu që diku nga mesi i qershorit, ai nuk ishte i saktë”, tha Kon për një stacion televiziv të martën.
“Vdekjet nuk mund të raportohen me saktësi nëse nuk ka kaluar një periudhë e caktuar kohe. Të dhënat e futura në certifikatën e vdekjes kthehen vetëm pas dy muajsh. Unë përpunova të dhënat deri në qershor. Deri në qershor, me pak fjalë, kishte tre herë më shumë vdekje jo vetëm nga ato që u njoftuan zyrtarisht, por edhe ato që u raportuan”, shtoi ai.
Në qershor, zyrtarët serbë hodhën poshtë një investigim të BIRN, sipas të cilit nga 19 marsi deri më 1 qershor, në Serbi kishin ndërruar jetë një total prej 632 njerëzish pasi kishin rezultuar pozitivë për koronavirus – më shumë se dyfishi i numrit të njoftuar zyrtarisht prej 244 vdekjesh që ishte deklaruar për atë periudhë.
Duke analizuar të dhënat e marra nga vetë sistemi shtetëror i informacionit për COVID-19, BIRN gjithashtu raportoi se numri i njerëzve që ishin infektuar në Serbi nga 17 qershori deri më 20 qershor ishte të paktën 300 në ditë, që ishte shumë më tepër se sa shifra e raportuar zyrtarisht . Ata regjistruan një maksimum prej 97 rastesh të reja në një ditë të vetme gjatë asaj periudhe.
Në atë pikë, zyrtarë nga Instituti Batut, i cili menaxhon sistemin e informacionit për COVID-19, nuk pranuan t’i përgjigjen pyetjeve të BIRN, kurse presidenti Vuçiç i hodhi poshtë zbulimet e BIRN.
