Qendra për Mbrojtjen e të Drejtave të Fëmijëve në Shqipëri prezantoi projektligjin që synon mbajtjen nën monitorim të abuzuesve seksualë me qëllim mbrojtjen e fëmijëve, vajzave dhe grave.
Qendra për Mbrojtjen e të Drejtave të Fëmijëve në Shqipëri, CRCA prezantoi të enjten nëpërmjet një takimi online nismën për krijimin e Regjistrit të të Dënuarve për Krime Seksuale në Shqipëri, në kuadër të Lëvizjes Kombëtare “Ne jemi një” që kryhet kundër dhunës ndaj fëmijëve dhe të rinjve.
“Të paktën 1 në 10 fëmijë në Shqipëri është viktimë e dhunës dhe ngacmimeve seksuale online apo në jetën e përditshme,” tha Altin Hazizaj , drejtori i përgjithshëm i CRCA në prezantim.
“Hartimi i këtij projektligji është diktuar nga nevoja për krijimin e një mekanizmi ligjor institucional efektiv dhe parandalues për mbrojtjen e fëmijëve, të rinjve, grave dhe çdo individi që rrezikon të jetë viktimë seksuale e grabitqarëve seksualë,” shtoi ai.
Një studim 10 vjeçar i CRCA/ECPAT mbi krimet seksuale në Shqipëri ka zbuluar se vetëm 43% e rasteve të raportuara të abuzimit seksual kundër fëmijëve arrin të ndiqet deri në fund penalisht nga sistemi i drejtësisë, duke lënë kështu në harresë rreth 57% të rasteve.
Një tjetër shqetësim është rritja e këtyre krimeve gjatë viteve të fundit. Sipas të dhënave të INSTAT, në vitin 2017 raportoheshin 113 krime seksuale në të gjithë vendin, ndërsa në vitin 2019 u raportuan 155 të tilla.
Regjistri i të Dënuarve për Krime Seksuale në Shqipëri pritet të funksionojë si një databazë me të dhënat e personave rezidentë, të dënuar me vendim të formës së prerë nga gjykatat vendase apo ato të huaja për krime seksuale ndaj të miturve dhe të rriturve. Ai konsiderohet një mjet parandalues në duart e institucioneve dhe shoqërisë për mbrojtjen e vajzave dhe grave nga abuzuesit seksualë.
Sipas përfaqësuesve të CRCA, fillimisht të dhënat personale të abuzuesve do t'i kalohen vetëm autoritetit përgjegjës të Drejtorisë së Përgjithshme të Policisë së Shtetit, si edhe autoriteteve zbatuese të ligjit, ndërsa për publikun emrat do të jenë konfidencialë.
Sipas Albana Mustafarajt nga CRCA, nga janari 2019 deri në qershor 2020 janë raportuar si të dhunuar seksualisht 66 fëmijë.
“Sipas monitorimeve të kryera asnjëri prej 98 personave, të cilët janë autorë të krimeve seksuale në Shqipëri nuk janë cilësuar si pedofilë nga drejtësia shqiptare apo nuk janë ndjekur me trajtime mjekësore gjatë vuajtjes së dënimit të tyre,” tha Mustafaraj.
Jozef Shkambi, koordinatori kombëtar për zyrën ligjore për mbrojtjen e fëmijëve dhe të rinjve, theksoi se rëndësia e këtij regjistri të abuzuesve seksualë nuk është vetëm në identifikimin e abuzuesve, por në monitorimin, kufizimin dhe rehabilitimin e tyre.
“Ne shpresojmë që ky regjistër do të ndikojë dhe në reduktimin e rasteve të tilla, siç kanë ndikuar edhe në vendet e tjera. Në momentin që grabitqarët regjistrohen në këtë regjistër për abuzuesit, ata njëkohësisht monitorohen si edhe përfshihen në programe rehabilitimi dhe ri-integrimi në shoqëri,” tha Shkambi për BIRN.