Qeveria e Kosovës miratoi në plan për të zbatuar një marrëveshje të nënshkruar me Shtetet e Bashkuara muajin e kaluar për të normalizuar disa lidhje ekonomike me Serbinë dhe për të vendosur marrëdhënie diplomatike me Izraelin.
Ditën e hënë qeveria e Kosovës miratoi një plan me 16 pika për të vënë në zbatim marrëveshjen që vendi nënshkroi me SHBA-në në Shtëpinë e Bardhë në shtator, njoftoi media kosovare Koha.
Zv/kryeministri Driton Selmanaj u tha ministrave gjatë një takimi qeveritar se tani është përgjegjësia e tyre “të marrin të gjitha masat e nevojshme për vënien në zbatim të këtyre aktiviteteve”.
Sipas planit, qeveria do të bashkëpunojë me administratën amerikane për të ngritur “një grup pune për një studim fizibiliteti” të liqenit të Ujmanit, në mënyrë që të përcaktojë shpërndarjet aktuale të burimeve ujore dhe të shqyrtojë mundësitë e mundshme të zhvillimit, raportoi Koha.
Ky rezervuar i rëndësishëm, i krijuar në vitet 1970 në pjesën veriore të Kosovës kryesisht të populluar nga serbët, pretendohet nga Serbia dhe ish-provinca e saj, Kosova, e cila shpalli pavarësinë në 2008.
Kosova dhe Serbia nënshkruan marrëveshje të veçantë me SHBA-në në Shtëpinë e Bardhë muajin e kaluar.
Të dy vendet u angazhuan të punojnë me SHBA-në për “një studim fizibiliteti me qëllim ndarjen e Liqenit të Ujmanit, si burim i besueshëm për furnizimin me ujë dhe energji elektrike”.
Pasi marrëveshjet u nënshkruan në prani të Donald Trump, i dërguari special i SHBA-së për dialogun Kosovë-Serbi, Richard Grenell, propozoi që rezervuari të quhet Liqeni Trump në nder të “rolit të presidentit amerikan në arritjen e një marrëveshje historike për normalizim ekonomik” dhe për të shmangur mosmarrëveshjet mbi emrin e liqenit.
Plani i qeverisë së Kosovës gjithashtu thotë se vendi do të bashkohet me të ashtuquajturën marrëveshje “mini-Shengeni” me Shqipërinë, Maqedoninë e Veriut dhe Serbinë, e cila parashikon lëvizjen e lirë të njerëzve, mallrave, kapitalit dhe shërbimeve midis tre vendeve të Ballkanit.
Ligji i Kosovës për lirinë e fesë do të ndryshohet për të siguruar mbrojtje shtesë për kishat ortodokse serbe në vend dhe do të vendoset një moratorium një vjeçar në aplikimet e Kosovës për anëtarësim në organizata ndërkombëtare.
Në një takim të martën me ministren e jashtme Meliza Haradinaj Stublla, kryeministri Avdullah Hoti tha se Kosova do të vendosë marrëdhënie diplomatike me Izraelin, siç është rënë dakord në Shtëpinë e Bardhë.
“Izraeli është një partner strategjik i Kosovës”, tha Hoti.
Marrëveshjet e Shtëpisë së Bardhë u përqendruan në çështje ekonomike dhe jo në çështje politike.
Të dy vendet ranë dakord të vazhdojnë punën në marrëveshjet e mëparshme për rivendosjen e lidhjeve ajrore dhe hekurudhore dhe të fillojnë ndërtimin e rrugëve të reja lidhëse dhe autostradave.
Serbia u zotua se do të ndalojë për një vit fushatën e saj për t'i bindur vendet e tjera ta “çnjohin” Kosovën, ndërsa Kosova premtoi të ndalojë aplikimin për anëtarësim në organizatat ndërkombëtare, gjithashtu për një vit.
Si Kosova ashtu edhe Serbia ranë dakord të punojnë më shumë në çështjet e personave të zhdukur, refugjatëve dhe personave të zhvendosur brenda vendit nga lufta e viteve 1990 në Kosovë.
Të dy vendet ranë gjithashtu dakord të pranojnë diplomat e arsimit të lartë të njëri-tjetrit.
Përsa i takon çështjeve të politikës së jashtme, në respekt të interesave të SHBA-së, të dy vendet ranë dakord ta përcaktojnë grupin islamik Hezbollah si “një organizatë terroriste” dhe të ndalojnë përdorimin e “pajisjeve 5G të furnizuar nga shitës të pabesueshëm në rrjetet e tyre të komunikimit” – mesa duket një referencë për Kinën.
Në një zhvillim tjetër të martën, krerët e Dhomave të Tregtisë të Serbisë dhe Kosovës, Marko Cadez dhe Berat Rukiqi, nënshkruan një deklaratë të përbashkët në ambasadën e SHBA-së në Beograd, duke u zotuar për krijimin e një ekipi të përbashkët për bashkëpunim ekonomik.
