Nën argumentimin se emri aktual i bashkisë Ura Vajgurore është “i papëlqyeshëm”, ministri i Turizmit dhe Mjedisit Blendi Klosi ka propozuar në parlament një projektligj për ta ndryshuar atë në “Dimal”, emri i një qyteze të lashtë ilire që gjendet në afërsi të kryeqendrës së bashkisë aktuale.
Një projektligj i propozuar në kuvendin e Shqipërisë nga ministri i Turizmit dhe Mjedisit Blendi Klosi synon të ndryshojë emrin e bashkisë Ura Vajgurore në Dimal, emri i një qyteti ilir që është identifikuar në një kodër pranë qytetit aktual.
“Emërtimi ekzistues , një emërtim jo estetik për t’u pwrdorurur, i ka humbur prej shumë kohësh aktualiteti edhe shpesh etiketohet si i papëlqyeshëm,” shkruan Klosi në relacionin shoqërues të propozimit.
Sipas Klosit, propozimi për emrin e ri është një “vizioni i ri për ta ndryshuar këtë emërtim në “Dimal”, një emërtim gjithëpërfshirës edhe i lidhur me identitetin tonë historik nga qytetërimi ilir.”
Sipas Klosit, qyteti i Dimalit ka pasur një rol të rëndëishëm gjatë luftërave Iliro-Romake, e madje edhe vetë Hanibali ka shprehur interesin që ky qytet të mos bjerë në ndikimin roman.
Bashkia e Urës Vajgurore u krijua në vitin 2015 me reformën administrative, mes debateve se ndarjet e pushtetit mes PS-së dhe LSI-së, në atë kohë në koalicion qeverisës, luajtën një rol në krijimin e bashkive si njësi vendesh pune pa ndonjë logjikë të mirëfilltë historike, demografike apo gjeografike.
Ura Vajgurore numëron 27 mijë banorë sipas censusit të fundit të zhvilluar në Shqipëri dhe 156 kilometra katrore.