Në një njoftim të publikuar në Facebook, ministri Sandër Lleshaj thotë se komenti i tij kundër deputetit Murrizi: “Polic ke qenë dhe polic ke mbetur” nuk nënkupton një cilësim fyes për figurën e policit, për të cilin ai thotë se ka respektin më të lartë.
Komenti në parlament të enjten i Ministrit të Brendshëm Sandër Lleshaj kundër deputetit opozitar Myslym Murrizi shkaktoi shumë barsoleta me polic nëpër rrjetet e medias sociale përgjatë njëzet e katër orëve të fundit, por vetë Lleshaj thotë se komenti i tij “është keqkuptuar”.
“Asnjëherë unë nuk i përdor në kuptim pezhorativ fjalët polic, ushtar apo kapter,” deklaroi Lleshaj në Facebook, i cili ka bërë karrierë si ushtarak para se të bëhej këshilltar për sigurinë i kryeministrit aktual dhe më pas, Ministër i Brendshëm.
Në një shkëmbim batutash, ndërsa Murrizi kritikoi si qesharake sjelljen e shtetit gjatë periudhës së parë të pandemisë së koronavirusit, e cila, sipas Murrizit u luftua edhe me diagaçë, tanke e autoblinda, me gjoba për qytetarët e gomerët, Lleshaj iu drejtua atij me fjalët: “Polic ke qenë dhe polic ke mbetur.”
Komenti i Lleshajt ngriti pikëpyetje nëse ai përdor fjalën “polic” si fyerje për kundërshtarin politik. Lleshaj, i cili nuk i kurseu fyerjet as në statusin e tij në Facebook të premten, kërkoi “ndjesë për keqkuptimin”.
“As nuk më ka shkuar ndonjëherë në mendje që t’i drejtohem deputetit Murrizi si polic, në kuptimin e punonjësit të sotëm të Policisë së Shtetit, për arsye se me qëndrimet e tij të padenja ndaj Policisë, me fjalorin e tij që përbëhet vetëm nga disa fjalë vulgare të huazuara kryesisht nga zoologjia dhe me biografinë e tij të shkurtër prej disa rreshtash është i skualifikuar në mënyrë absolute nga mundësia që të cilësohet si polic,” deklaroi Lleshaj.
Murrizi në fakt nuk rezulton të ketë punuar në Policinë e Shtetit. Sipas CV-së së tij të publikuar në faqen e Kuvendit të Shqipërisë, ai ka punuar pas viteve ’90 në Policinë Financiare, një zyrë e Drejtorisë së Përgjithshme të Tatimeve.
Ndryshe nga Murrizi, Lleshaj e ka CV-në më të pasur. Ai ka studiuar si oficer në Akademinë Ushtarake në vitin 1985 dhe ka shërbyer në forcat kundërajrore në vitet e fundit të komunizmit.
Shqiptarët përdorin fjalën polic në të dyja kuptimet, për t’iu referuar një punonjësi të forcave të rendit publik dhe në kuptim fyes për të cilësuar një njeri të trashë dhe të pagdhendur, referuar barsoletave të shumta që vënë në lojë autoritetin e shtetit.