Kadri Veseli, kreu i Partisë Demokratike të Kosovës dhe një bashkëthemelues i Ushtrisë Çlirimtare të Kosovës, tha se aktakuza kundër tij është konfirmuar dhe se ai do të udhëtojë në Hagë për t'u përballur me akuzat.
Kadri Veseli tha në një deklaratë të enjten se ishte informuar nga prokurorët në Dhomat e Specializuara të Kosovës në Hagë se një gjyqtar i procedurës paraprake ka autorizuar aktakuzën ndaj tij për krime lufte dhe se ai “ka bërë aranzhimet e nevojshme për të udhëtuar vullnetarisht drejt Hagës në mënyrë që t'iu përgjigjem këtyre akuzave”.
Veseli, i cili shërbeu si kryetar parlamentar deri në zgjedhjet e fundit dhe ishte një nga themeluesit dhe udhëheqësit e Ushtrisë Çlirimtare të Kosovës, UÇK, tha se ndryshe nga disa njerëz në Kosovë, ai nuk i sheh Dhomat e Specializuara si “një fyerje për luftën tonë historike për mbrojtjen e popullit të Kosovës nga krimet e regjimit të Millosheviçit”.
Ai tha se ai mendon se kjo është “një mundësi që më në fund të përgjigjem ndaj këtyre dyshimeve dhe thashethemeve të rrejshme të cilat kanë qarkulluar për vite të tëra” për krime të dyshuara lufte nga guerilasit e UÇK-së.
“Kjo është arsyeja që unë e kam përkrahur themelimin e këtij tribunali, dhe kjo është arsyeja që unë tani jam i gatshëm që të luaj rolin tim në këtë proces.”
Prokuroria e Specializuar e Kosovës njoftoi në qershor se kishte qëllim të akuzonte Veselin, presidentin e Kosovës Hashim Thaçi dhe të tjerë për një sërë krimesh kundër njerëzimit dhe krimesh lufte, duke përfshirë vrasje, zhdukje me forcë të personave, përndjekje dhe tortura.
“Aktakuza pretendon se Hashim Thaçi, Kadri Veseli dhe të dyshuarit e tjerë të akuzuar janë penalisht përgjegjës për gati 100 vrasje. Krimet e pretenduara në aktakuzë përfshijnë qindra viktima të njohura shqiptarësh të Kosovës, serbësh, romësh dhe të etnive të tjera dhe përfshijnë kundërshtarë politikë”, tha ajo.
Ndërkohë ish-oficeri i Ushtrisë Çlirimtare të Kosovës Rexhep Selimi, tani një politikan i lartë në partinë më të madhe opozitare të Kosovës, Lëvizja Vetëvendosje, gjithashtu ka konfirmuar se është akuzuar për krime të pretenduara të kohës së luftës dhe se do të udhëtojë në Hagë të enjten për t'u përballur me akuzat.
“Sonte në mbrëmje u njoftova nga Dhomat e Specializuara të Kosovës se ka një aktakuzë të konfirmuar për mua”, shkroi Selimi në Facebook, duke shtuar se ai “do të udhëtojë në Hagë (Holandë) për t'u përballur me këtë sfidë që i është vënë, para së gjithash, Ushtrisë Çlirimtare e Kosovës ”.
“Unë po shkoj me kokën lart dhe kurdo që kthehem, do kthehem po ashtu me kokën lart… Kam ditur e do të di gjithmonë ta mbroj lirinë e popullit, shtetin e Kosovës dhe UÇK-në e lavdishme”, shtoi ai.
Selimi shërbeu në selinë e Ushtrisë Çlirimtare të Kosovës gjatë luftës 1998-1999 kundër forcave serbe.
Ish-kryeministri dhe kreu i partisë së Selimit, Albin Kurti, i cili aktualisht është në vetëizolim për shkak të COVID-19, shkroi në Facebook të mërkurën në mbrëmje në “padrejtësia vazhdon”.
Kurti po i referohej aktakuzës ndaj Selimit dhe arrestimit, më herët gjatë ditës, të ish-sekretarit të UÇK-së Jakup Krasniqi, i cili është gjithashtu një ish-kryetar i parlamentit të Kosovës.
Krasniqi u arrestua të mërkurën gjatë bastisjes në shtëpinë e tij në Prishtinë dhe në atë në fshatin e tij të lindjes Negrovc.
Ai u arrestua “bazuar në një aktakuzë të konfirmuar në lidhje me krime lufte dhe krime kundër njerëzimit”, tha Zyra e Prokurorit të Specializuar.
Ish-anëtari i parë i UÇK-së i arrestuar, Salih Mustafa, pretendoi pafajësi për krime lufte në Dhomat e Specializuara më 28 tetor.
Ndërkohë presidenti i Kosovës Hashim Thaçi po pret të shohë nëse akuzat kundër tij do të konfirmohen nga një gjykatës në Dhomat e Specializuara.
Dhomat e Specializuara të Kosovës u ngritën për të gjykuar krimet e pretenduara se janë kryer gjatë dhe pas luftës në Kosovë, nga viti 1998 deri në vitin 2000. Ato janë pjesë e sistemit të drejtësisë të Kosovës, por ndodhen në Holandë dhe kanë staf ndërkombëtar.
Ato u krijuan nën presionin e madh të aleatëve perëndimorë të Kosovës, të cilët druheshin se sistemi i drejtësisë në Kosovë nuk ishte aq i fuqishëm sa të gjykonte çështje kaq të ndjeshme dhe të mbronte dëshmitarët
E ashtuquajtura “Gjykatë Speciale” shihet me përbuzje nga shqiptarët e Kosovës, që e konsiderojnë atë si një fyerje të luftës së UÇK-së për çlirim nga sundimi serb.
