Rexhep Selimi, një ish-luftëtar i Ushtrisë Çlirimtare të Kosovës, i cili tani është një figurë e lartë në partinë më të madhe të opozitës në Kosovë, Lëvizja Vetëvendosje, u vetëdeklarua i pafajshëm në Hagë për krime lufte dhe krime kundër njerëzimit.
Rexhep Selimi, i cili akuzohet për krime lufte dhe krime kundër njerëzimit së bashku me presidentin tashmë të dorëhequr të Kosovës Hashim Thaçi dhe ish-kryetarin e parlamentit Kadri Veseli, pretendoi pafajësi në një seancë paraprake në Dhomat e Specializuara të Kosovës në Hagë të mërkurën.
“Ne të pandehurit rrugët këtu i kemi të ndara, jemi palë të ndryshme, por me bëni të besoj që qëllimi i të gjithë neve këtu do të jetë drejtësia e mbi të gjitha e vërteta”, tha Selimi në gjykatë.
Selimi është ish-drejtor operacionesh në Shtabin e Përgjithshëm të Ushtrisë Çlirimtare të Kosovës, UÇK, dhe aktualisht është kreu i grupit parlamentar të Lëvizjes Vetëvendosje.
Ai akuzohet, së bashku me Thaçin, Veselin dhe Jakup Krasniqin për një sërë krimesh lufte dhe krimesh kundër njerizimit që përfshinin ndalime të paligjshme, torturë, vrasje, zhdukje me forcë dhe persekutim nga marsi 1998 deri në shtator 1999.
Në aktakuzë thuhet se ata ishin pjesë e një “ndërmarrje të përbashkët kriminale” që synonte të merrte kontroll mbi Kosovën “duke përfshirë kanosjen, keqtrajtimin, kryerjen e dhunës kundër dhe në mënyrën e paligjshme ndaj atyre që konsideroheshin si kundërshtarë”.
Ajo thotë këta kundërshtarë përfshinin njerëz të cilët ishin ose perceptoheshin se kishin bashkëpunuar ose shoqëruar me forcat jugosllave ose nuk mbështesnin qëllimet ose mjetet e UÇK-së.
Shumica e krimeve në aktakuzë u kryen në qendrat e paraburgimit të UÇK-së në Kosovë dhe Shqipëri.
Të katër të pandehurit janë vetëdeklaruar të pafajshëm.
Selimi i tha gjykatësit se gjatë luftës kundër forcave serbe të Sllobodan Millosheviçit, e cila u përfundua nga ndërhyrja ushtarake e NATO-s, ai “luftoi kundër okupatorit serb i cili solli vetëm të keqe në vendin tim – vrasje, shpërngulje, poshtërim dhe gjenocid”.
“Unë e kam bërë vetëm detyrën time si qytetar i vendit tim, unë jam veç një çlirimtar që luftën për liri e kam nisur me Adem Jasharin dhe e kemi përfunduar me gjeneralin (Wesley) Clark dhe me NATO-n”, shtoi ai.
Dhomat e Specializuara të Kosovës u krijuan për të gjykuar krime të dyshuara të kryera gjatë dhe menjëherë pas luftës në Kosovë nga viti 1998 deri në 2000. Ato janë pjesë e sistemit gjyqësor të Kosovës, por të vendosura në Holandë dhe përbëhen nga staf ndërkombëtar.
Ato u krijuan nën presion nga aleatët perëndimorë të Kosovës, të cilët druheshin se sistemi i drejtësisë në Kosovë nuk ishte aq i fuqishëm sa të gjykonte çështjet e UÇK-së dhe të mbronte dëshmitarët nga ndërhyrjet.
E ashtuquajtura “Gjykatë Speciale” nuk shihet me sy të mirë nga shqiptarët e Kosovës që e shohin atë si një fyerje ndaj luftës së UÇK-së për çlirim nga sundimi serb.
