Komisioni Europian miratoi një paketë prej 103 milionë euro ndihmash për Shqipërinë, nga të cilat, gjysma kanë për qëllim të ndihmojnë në zgjidhjen e problemeve të shkaktuara nga pandemia ndërsa pjesa tjetër do të financojnë programet e shtetit të së drejtës, përfshirë Operacionin Ndërkombëtar të Monitorimit.
Komisioni Europian njoftoi të enjten se ka miratuar një paketë të re ndihmash me vlerë 103 milionë euro nga të cilat, afro 51 milionë do të shërbejnë për të blerë materiale për sektorin e shëndetësisë dhe për të trajtuar pasojat negative shoqërore dhe ekonomike të krizës së koronavirusit të ri.
Komisioneri për Zgjerimin Olivér Várhelyi deklaroi se “përballë krizës COVID-19, ne kemi vendosur të përshtasim financimet ekzistuese për të ndihmuar Shqipërinë të përballet me sfidat aktuale shoqërore dhe ekonomike.”
Mes financimeve të miratuara janë edhe 8.7 milionë euro për Operacionin Ndërkombëtar të Monitorimit të reformës në drejtësi, program që po hyn tani në fazën e dytë.
Operacioni ka monitoruar në veçanti procesin e kontrollit të gjyqtarëve dhe prokurorëve nga institucionet e Komisionit të Pavarur të Kualifikimit dhe Kolegjit të Posaçëm të Apelimit.
