Këshilli i Emërimeve në Drejtësi vendosi të hënën të ndalojë kandidimin e tre prej gjashtë kandidatëve për dy vakancat në Gjykatën Kushtetuese të shpallura nga Presidenti i Republikës dhe Kuvendi i Shqipërisë, ndërkohë që një është tërhequr. Altin Binaj dhe Aleksandër Toma u lejuan të kandidojnë për dy vendet vakante.
Këshilli i Emërimeve në Drejtësi, KED vendosi të hënën të lejojë kandidimin për në Gjykatën Kushtetuese të dy prej gjashtë kandidatëve që kishin aplikuar për dy vakancat e parakohshme të shpallura nga Presidenti i Republikës dhe Kuvendi i Shqipërisë.
Në njoftimin e KED thuhet se në mbledhjen e të hënës janë shqyrtuar gjetjet e procedurave të verifikimit për kandidatët Zhaklina Peto, Eugen Papandile, Aleksandër Toma, Altin Binaj, Ilir Hasnedari dhe Orkida Totojani që kanë aplikuar për vendin vakant të shpallur dhe rishpallur tri herë nga Presidenti i Republikës prej shkurtit 2018 e në vazhdim. Dy prej kandidatëve që kanë aplikuar për vakancën e shpallur nga Presidenti i Republikës, Altin Binaj dhe Ilir Haznedari, i janë përgjigjur edhe shpalljes së vendit vakant nga Kuvendi i Shqipërisë.
Aktualisht Gjykata Kushtetuese ka 4 anëtarë; Vitore Tushën, Elsa Toskën, Marsida Xhaferllarin dhe Fiona Papajorgjin. Pesë anëtarë të tjerë priten të zgjidhen mes Presidentit të Republikës, Kuvendit dhe Gjykatës së Lartë.
KED sqaron se pas shqyrtimit të dokumentacionit lidhur me plotësimin e kushteve ligjore nga secili kandidat, u vendos që të lejohet Altin Binaj për të vazhduar garën për të dy vendet vakante të shpallura nga Presidenti i Republikës dhe nga Kuvendi i Shqipërisë. Gjithashtu, është vendosur që edhe Aleksandër Toma të vazhdojë kandidimin për vakancën e shpallur nga Presidenti i Republikës.
Ndërkohë KED ka ndaluar kandidimin e Eugen Papandiles, Zhaklina Petos dhe Ilir Haznedarit. “Kandidatët për të cilët është vendosur ndalimi, kanë pasur mangësi të një apo disa kushteve të parashikuara nga Kushtetuta dhe ligji”, citohet në njoftim.
KED ka vendosur edhe përfundimin e procedurës së verifikimit për kandidatët Orkida Totojani dhe Eugen Papandile, për vakancën e shpallur nga Presidenti i Republikës më 7 shkurt 2018, për shkak të tërheqjes së tyre.
Më parë janë tërhequr nga kandidimi Klodian Rado, Prel Martini dhe Envi Hicka. KED vendosi në muajin korrik të ndalojë kandidimin e Besnik Muçit, Ardita Alsulës, Shaqir Hasanajt, Vjosa Bodos, Vasil Benods dhe Dedë Kasnecit, edhe këta për mangësi të kushteve.
Dy thirrje paralele të hapura nga Kuvendi i Shqipërisë dhe Presidenti i Republikës prej shkurtit 2018 nuk kishin arritur të prodhonin asnjë kandidatë të vlefshëm deri në mbledhjen e të hënës më 23 nëntor.
Gjykata Kushtetuese po hyn në vitin e tretë të mosfunksionimit të saj, pas rrëzimit në veting dhe largimit me dorëheqje të anëtarëve të saj. Ndërkohë, procedurat për zgjedhjen e anëtarëve të rinj në vjeshtën e vitit 2019 shkaktuan një konflikt të ashpër mes institucionit të Presidentit të Republikës dhe kreut të Këshillit të Emërimeve në Drejtësi, Ardian Dvorani, duke sjellë edhe largimin e këtij të fundit.
