Rezultatet e monitorimit për vitin 2020 për popullatën e shkabës së rrezikuar të Kalit të Qyqes në Ballkan dhe Afrikë, nxorën në pah nevojën për të minimizuar faktorët rrezikues për vazhdimësinë e kësaj specie të rrallë.
Ekipet e monitorimit në terren kanë sjellë optimizëm për sa i përket të dhënave që kanë të bëjnë me popullatën e Kalit të Qyqes në Ballkan.
Sipas Shoqatës së Ruajtjes dhe Mbrojtjes së Mjedisit Natyror në Shqipëri (PPNEA) dhe Shoqatës së Ornitologëve Shqiptarë (AOS), në Shqipëri janë identifikuar 3 çifte të Kalit të Qyqes dhe 3 individë në 9 territore të vendit.
“Edhe pse një numër i njëjtë territoresh, fatkeqësisht është vënë re humbje e një territori të vjetër si dhe fatmirësisht, është raportuar rasti i një territori të ri, çfarë ka bërë që numri i territoreve të zënë të qëndrojë i njëjtë me vitet e kaluara,” thanë nëpërmjet një njoftimi për shtyp PPNEA dhe AOS.
Në kuadër të projektit “LIFE – Jetë e re për Kalin e Qyqes”, në 14 vende të Ballkanit, Afrikës dhe Lindjes së Mesme, grupe studimore ndërmarrin vit pas viti iniciativa monitoruese për të identifikuar ecurinë dhe masat që duhet të ndërmerren për rimëkëmbjen e kësaj shkabe të rrezikuar.
Sipas grupeve të studimit, monitorimi i këtij lloji shkabe kërkon një impenjim të veçantë, pasi duhet shpenzuar edhe koha e nevojshme pranë territoreve të folezimit për të nxjerrë rezultatet e duhura në lidhje me territoret e zëna prej tij – numrit të çifteve apo individëve, numrin e foshnjeve të çelura, e të tjera.
Sipas rezultateve të publikuara nga PPNEA dhe AOS, në nivel Ballkani u shënua një rritje me 9% në numrin e çifteve.
“Dy prej këtyre çifteve u identifikuan në Bullgari, 1 në Shqipëri dhe 1 tjetër në Greqi”, citohet në raportin e ekipeve monitoruese. “Fatkeqësisht, numri i individëve të çelur e të aftë për të fluturuar ishte më i ulët se vitin e kaluar”, vijon raporti.
Një prej faktorëve kyç të uljes drastike të popullatës së Kalit të Qyqes mbetet helmimi, ndjekur nga faktorë të tillë si elektroshoku, apo përplasja me shtyllat e energjisë elektrike.
Pikërisht në lidhje me këto faktorë rrezikues për vazhdimësinë e kësaj specie, ekspertët dhe studiuesit e fushës janë duke bashkuar forcat për ndërmarrjen e disa masave specifike për të minimizuar këto rreziqe si në territoret e folezimit ashtu edhe në territoret që përshkohen nga Kali i Qyqes gjatë shtegtimit dhe rrugëtimit të tij.
