Pas një mbledhjeje të mërkurën, Komiteti Teknik i Ekspertëve që menaxhon situatën me pandeminë e koronavirusit, deklaroi se masat aktuale do të vijojnë ndërsa nuk ndërmori masa të reja ndërsa argumentoi se gjatë ditëve të fundit, masat aktuale “kanë dhënë ndikim” në uljen e numrit të infektimeve.
Komiteti i Ekspertëve vendosi të mërkurën të mbajë në fuqi kufizimet aktuale për ndalimin e përhapjes së koronavirusit të ri, të tilla si ndalimqarkullimi gjatë orëve të natës, puna nga shtëpia për administratën publike, mësimi i alternuar në distancë dhe në shtëpi dhe ndalimi i grumbullimeve me mbi 10 persona, por nuk vendosi masa shtesë duke argumentuar se “java e fundit ka treguar një ndikim të masave shtrënguese si ora policore.”
“Do të vijojnë të jenë të ndaluara grumbullimet me mbi 10 persona në vende të hapura dhe të mbyllura si dhe mbledhjet partiake, tubimet, konferencat, ceremonitë e festave, ceremonitë martesore dhe organizimet e ceremonive mortore, përtej atyre familjare. Do të vazhdoje të jetë në fuqi pa afat kufizimi i lëvizjes së qytetarëve nga ora 22:00-6:00, ku përjashtim përbëjnë emergjencat dhe arsyet e punës. Do të vijojë të ketë kufizim të bareve, restoranteve, fast food, nga ora 22:00-6:00, përveç shërbimit delivery”, deklaroi Mira Rakacolli.
Shqipëria regjistroi viktimën e tetëqindtë më 30 nëntor ndërsa deri më 2 dhjetor, numri i viktimave të njohura zyrtarisht arriti në 822. Vetëm gjatë muajit nëntor kanë vdekur 301 persona dhe tendenca e numrit të vdekjeve është dukshëm në rritje.
Aktualisht ka 506 persona të shtruar në spitale nga të cilët, 39 janë nën kujdes intensiv. Numri i personave nën kujdes intensiv është rritur në mënyrë dramatike gjatë javës së fundit. Qeveria është përballur me akuza nga opozita mbi numrin e të vdekurve nga pandemia, ku opozita thotë se vdekshmëria është më e lartë. Komiteti i ekspertëve, ndërsa ka hedhur poshtë akuzat, nuk ka shpjeguar shumë nga metodologjia që ndjek për klasifikimin e vdekjeve. Në konferencën e të mërkurës, një gazetare e pyeti komitetin nëse vdekjet e raportuara përfshijnë vetëm vdekjet e ndodhura në spitale apo edhe ato të ndodhura në shtëpi. Komiteti nuk dha një përgjigje të qartë.
“Ka të përcaktuar mirë ligjërisht dhe shkencërisht, kur plotësohet një skedë vdekjeje, arsyet pse i sëmuri vdes. Nuk mund të bëhet asnjë ndërhyrje ose të krijohet një artificë si në lidhje me diagnozën e pranimit, diagnozën e evolucionit te rasteve ashtu dhe të përfundimit. Në këtë rast nuk mund të ketë asnjë lloj, në thonjëza ‘falsifikimi ose ndryshimi’,” deklaroi Tritan Kalo, mjek i spitalit infektiv. Por ai tha se për të ditur nëse vdekjet e ndodhura në shtëpi klasifikohen apo jo në statistikat zyrtare si vdekje nga COVID-19, për këtë duhen pyetur gjetkë.
“Për sa i përket rasteve të humbjes së jetës në shtëpi, unë nuk mund t’ju them asgjë sepse në këtë rast janë zyrat e gjendjes civile që e saktësojnë ose mjekët e familjes apo mjekët e agjencisë rajonale të shëndetit që i dinë më mirë këto shifra,” tha ai.
Shqipëria shënoi gjithashtu një numër relativisht më të vogël infektimesh për disa ditë me radhë gjatë javës së kaluar, ditë kur edhe numri i testimeve ishte krahasimisht më i ulët se sa më parë. Sipas Eugena Tominit nga Komiteti Teknik, rënia e numrit të infektimeve gjatë javës së kaluar lidhet me shfaqjen e rezultatit të masave aktuale.
Komiteti bëri të ditur se për momentin çerdhet dhe kopshtet do të vijojnë të mbeten të hapura për shkak se nuk është vënë re deri më sot ndonjë problem me këtë grupmoshë.
