Prokuroria e Posaçme, SPAK njoftoi sekuestrimin e një apartamenti dhe 4 parcelave tokë në pronësi të ish-kreut të Prokurorisë së Përgjithshme, Adriatik Llalla, këtë herë sipas ligjit “Antimafia”.
Prokuroria e Posaçme kundër Korrupsionit dhe Krimit të Organizuar, SPAK njoftoi të enjten se gjykata kishte vendosur sekuestrimin e pronave të ish-prokurorit të Përgjithshëm, Adriatik Llalla në kuadër të ligjit “Antimafia”.
Në një njoftim për mediat, SPAK bëri me dije se masa e sekuestrimit të pasurive është një proces autonom nga procesi penal që është duke u zhvilluar ndaj Llallës me akuzën e fshehjes së pasurive.
Hetimi ndaj Llallës u regjistrua fillimisht nga Prokuroria e Durrësit më 15 mars 2018 me akuzat e fshehjes së pasurisë, shpërdorimit të detyrës dhe pastrimit të parave. Ai u hetua edhe për veprën penale të “mosdeklarimit të shumave monetare në kufi”.
Më pas, dosja u dërgua në Prokurorinë e Krimeve të Rënda dhe në korrik 2018, gjykata respektive vendosi sekuestron e pronave të ish-Prokurorit të Përgjithshëm. Në një njoftim për shtyp të atëhershëm, Prokuroria e Krimeve të Rënda bëri të ditur se Llallës iu vendosën nën sekuestro një apartament 67 metra katrorë në Durrës dhe katër parcela toke me sipërfaqe të përgjithshme prej rreth 22 mijë metrash katrorë në periferi të Tiranës.
Më 19 nëntor, pas disa muajve shtyrje të seancës paraprake, gjyqtarja Irena Gjoka pranoi kërkesën e SPAK për gjykimin e Llallës për fshehje të pasurisë dhe në të njëjtin vendim liroi nga sekuestroja pronat e sekuestruara në fillim të hetimit nga ish-Krimet e Rënda. SPAK kërkoi sërish sekuestrimin e pasurive të Llallës, por këtë herë bazuar në ligjin “Antimafia” dhe përmes një procedimi të ndarë.
Vendimi i sekuestros së Gjykatës së Posaçme përfshin sërish apartamentin në Durrës dhe katër parcelat e tokës në periferi të Tiranës. Sipas SPAK, hetimi pasuror për Llallën nuk ka përfunduar ende.
