Gjykata e Lezhës caktoi masë sigurie me burg për dy të arrestuarit me bomba telekomandë. Ata pretenduan se çantën me bomba ua kishte lënë një i tretë.
Gjykata e Lezhës caktoi masë sigurie me burg për dy të arrestuarit me bomba me telekomandë, pak ditë më parë. Në seancen gjyqësore të zhvilluar me dyer të mbyllura të shtunën, Erol Çiçi dhe Maringlen Gruda, kanë kundërshtuar akuzën dhe kanë pretenduar se çanta u është dhënë nga persona të tretë dhe se nuk kanë patur dijeni se brenda saj kishte lëndë shpërthyese.
Përmes avokatit ata kanë pretendetuar se kanë pasur një bashkëudhëtar të tretë, por këtij të fundit i ishte prishur makina dhe u kishte lënë atyre çantën duke u kërkuar ta prisnin në Lezhë. Por pretendimet e tyre nuk u morën parasysh nga gjykata e cila referuar provave të paraqitura nga prokurori Arben Agovi vendosi masën e sigusë arrest me burg për dy të ndaluarit.
Erol Çiçi 33-vjeç dhe Maringlen Gruda 30-vjeç që të dy banues në Durrës u arrestuan në hyrje të qytetit të Lezhës, pasi gjatë kontrollit të ushtruar nga Policia, në çantën e shtetasit Maringlen Gruda janë gjetur dy bomba me mekanizëm shpërthimi në distancë nëpërmjet aparatit telefonik celular. Policia njoftoi se një nga bombat ishte me lëndë të dyshuar plasëse të llojit tritol dhe tjetra me dinamit. Policia dyshon se ata do t’i trafikonin bombat në drejtim të Malit të Zi.
“Specialistët për Hetimin e Narkotikëve dhe Trafiqeve të Paligjshme në Policinë e Lezhës, nën drejtimin e Prokurorisë kishin marrë informacion për veprimtarinë e këtyre shtetasve dhe prej 1 muaj ishin vënë në vëzhgim dhe ndjekur me metoda proaktive”, njoftoi policia. Ndërsa nga hetimet rezulton se ata janë transportues të lëndës shpërthyese në distancë.
