Kryeministri Edi Rama mbajti një qëndrim sfidues në një fjalim të mbajtur pas vrasjes së një 25 vjeçari të paarmatorus nga Policia e Shtetit, duke e konsideruar vrasjen një ngjarje të izoluar ndërsa shpalli se policia e shtetit është nën presionin e “dhunës së opozitës”. Rama shpalli gjithashtu se Ministri i Brendshëm Sandër Lleshaj i ka ofruar dorëheqjen.
Kryeministri Edi Rama mbrojti policinë e shtetit duke hedhur poshtë sugjerimet se vrasja e 25-vjeçarit Klodjan Rasha nga një oficer policie janë rrjedhojë e një tendence dhune policore mbi popullsinë dhe e konsideroi vrasjen si një ngjarje të izoluar. Rama mbajti një fjalim që zgjati për shumë minuta, në të cilat përdori togfjalësha me rimë në mbrojtje të vetvetes.
Në mes të fjalive të gjata poetike, kryeministri njoftoi se Ministri i Brendshëm Sandër Lleshaj, i ka ofruar dorëheqjen e tij që në ditën e ngjarjes, por se ky fakt nuk është bërë publik pasi Rama dëshironte ta shihte në sy.
“Policia është e shtetit dhe jo e pushtetit,” “jo shembullit të forcës, por forcës së shembullit,” ishin disa nga fjalitë me rimë të thëna nga Rama, i cili e konsideroi ngjarjen një “përjashtim tragjik që përforcon rregullin e këtyre viteve se policia e shtetit mbron qytetarët.”
Fjalimi i Ramës ndodhi në një kohë kur Shqipëria hyri në një ditë të dytë përplasjesh sporadike mes të rinjve protestues dhe forcave të policisë.
Protesta pati në Tiranë, Korçë e Lezhë. Video të transmetuara në media tregojnë të rinj që i gjuajnë me gurë policisë dhe institucioneve publike ndërsa policia i përgjigjet me spraj lotsjellës.
Sandër Lleshaj, një ish-gjeneral i ushtrisë i periudhës së komunizmit dhe pas saj, është vënë nën kritika përgjatë dy viteve të fundit për përdorim indiskriminues të gazit lotsjellës kundër qytetarëve.
Organizatat e shoqërisë civile kanë protestuar në disa raste ndaj disa propozimeve ligjore të Lleshajt, duke i cilësuar ato në shkelje të të drejtave themelore të njeriut.
