Këshilli i Lartë Gjyqësor vendosi të pranojë kërkesën e Inspektorit Artur Metani dhe shkarkoi gjyqtarin e Gjykatës së Korçës Markelian Kuqo, për vendimin e lirimit me kusht të Gerd Gjenerarit.
Inspektori i Lartë i Drejtësisë, Artur Metani, njoftoi të enjten se Këshilli i Lartë Gjyqësor kishte pranuar kërkesën e tij dhe kishte vendosur shkarkimin nga detyre të gjyqtarit të Gjykatë së Korçës Markelian Kuqo.
Në njoftimin për shtyp të ILD-së thuhet se drejtuesja e KLGJ Naureda Llagami kishte njoftuar se Këshilli kishte vendosur unanimisht shkarkimin e Kuqos, ndaj të cilit Inspektpori nisi hetim disiplinorë pas lirmit me kusht “të dënuarit me burgim të përjetshëm Gerd Gjenerari, i gjetur fajtor për një vrasje të kryer në vitin 1997”.
Vendimi i gjyqtarit u rrëzua në Apel, pas ankimit të Prokurorisë së Korçës, por Gjenerari nuk është kthyer më në qeli dhe nuk është gjetur dot nga policia.
Në arsyetimin e kërkesës për shkarkimin e gjyqtarit Markelian Kuqo, ILD e akuzon atë se kishte cënuar besimin e publikut te drejtësia dhe se kishte vendosur një precedent të rrezikshëm. Në argumentim Metani arsyetoi se gjyqtari kishte qenë kontradiktor në referencat ligjore.
“Nga kontrolli gjyqësor i ushtruar nga gjykata më e lartë, është konstatuar se gjyqtari nuk ka qenë konsekuent për t’iu referuar ligjit të zbatueshëm atë të kohës së kryerjes së veprës penale, ka aplikuar dispozita favorizuese në lidhje me përmbushjen e afatit kohor për lirimin me kusht (25 vite), ndërsa për kriterin ndalues (nenit 78/a të K.Penal), ka zbatuar ligjin penal të kohës kur është paraqitur dhe shqyrtuar kërkesa”, argumentoi ILD.
Sipas Inspektorit arsyetimi i bërë nga ana e magjistratit nuk ishte “në përputhje me provat e administruara në gjykim dhe në përputhje me faktet dhe rrethanat që janë provuar gjatë procesit gjyqësor”. Madje sipas Inspektorit “Faktet dhe rrethanat janë parashtruar dukshëm në mënyra të shtrembëruar dhe vetëm për t’iu përshtatur plotësimit të kërkesave formale (me natyrë objektive) si dhe atyre me natyrë subjektive të nenit 64 dhe 65 të Kodit Penal”.
Gjyqtari Kuqo i kundërshtoi akuzat para KLGJ-së duke i cilësuar inkuizicion. “Kjo në këtë rast është inkuizicion. ILD e pranon që vendimi ka argument. Vendimi në fakt nuk mund të shërbejë si praktikë gjyqësore dhe unë s’kam pse të kem asnjë përgjegjësi pse përdoret vendimi nga të tjerët. Po ky është inkuizicion”, u shpreh ai në mbrojtje.
Ai po ashtu paraqiti si provë se një procedim penal ndaj punonjësve të burgut të Drenovës që kishte lëshuar raporte pozitive për të dënuarin me burg përjetë, u pushua nga prokuroria pasi nuk kishte vepër penale.
Kuqo arsyetoi në mbrojtje se ILD kishte bërë vlerësimi jo-ligjore dhe kishte tejkaluar kompetencat që i ishin dhënë me ligj. “Veprimtaria e ILD-së në këto drejtime, për sa kundërshtoj në kuadër të mbrojtjes, paraqitet plotësisht me vlerësime jo ligjore, në disa raste tej kompetencës që ligja e kufizon në hetim dhe vlerësim, paraqitet si veprimtari tërësisht e njëanshme dhe e përmbushur vetëm formalisht”, thuhet në mbrojtjen e gjyqtarit të shkarkuar nga KLGJ.
Ai po ashtu pretendoi se procesi disiplinor ndaj tij ishte “i metë, me qëllime të paracaktuara jo ligjore”, ndërsa arsyetoi se atij nuk i ishte gjetur asnjë shkelje edhe pse ishte hetuar në vendimet e dhëna gjatë tre viteve të fundit.
Në njoftim ILD bën me dije se po vijon hetimet edhe për raste të ngjashme. “Inspektori i Lartë i Drejtësisë ka në proces hetimi për vendimmarrje të ngjashme edhe magjistratë të tjerë dhe pas përfundimit të hetimeve do marrë vendimet përkatëse”, thuhet në njoftim.
ILD ka të hapur edhe katër hetime të ngjashme, ndërsa Inspektori u investua që në fillim të detyrës të hetonte dosjet e gjykatave për lirimet me kusht, pasi disa të dënuar për krime të rënda u liruan edhe pse nuk kishin bërë pjesë të mëdha të dënimit. Në një raport për Kuvendin, ILD bënte me dije procedimet ndaj gjyqtares së Krujës Enkeledi Hoxha dhe prokurorit Bujar Memia, hetim që nisi pas lirimit kontrovers të Endrit Dokles, një prej të dënuarve me burg përjetë si anëtar i Bandës së Durrësit.
Lexo edhe:
“Rrethana të jashtëzakonshme”, Gjykata vendos lirimin e Gerd Gjeneralit, prokuroria lajmëron apelim
