Dhjetëra të rinj kanë hedhur shashka, gurë dhe sende të forta drejt ndërtesave të institucioneve dhe policisë në Lezhë, në protestë kundër vrasjes nga një oficer police e të riut Klodian Rasha.
Dhjetëra qytetarë, pjesa më e madhe e të cilëve të rinj, protestuan të enjten në Lezhë për vrasjen nga efektivi i policisë të 25-vjeçarit Klodian Rasha.
Protestuesit u grumbulluan pranë obeliskut të Besëlidhjes rreth orës 17:00 dhe pasi ndezën qirinj në përkujtim të të ndjerit, marshuan përgjatë rrugës “Luigj Gurakuqi” drejt komisariatit të policisë, duke hedhur “Rama Ik”, “Drejtësi për Klodin” dhe “Polici e Krimit”,
Përpara ndërtesës së komisariatit të rinjtë ndezën qirinj dhe më pas hodhën shashka e sende të forta në drejtim të godinës.
Më pas ndalesa e radhës e protestuesve ishte Prokuroria e Rrethit Gjyqësor Lezhë. Aty ata rrëzuan me dhunë derën e institucionit dhe thyen xhamat e vendqëndrimit të rojës.
Rasha u qëllua për vdekje mëngjesin e 8 dhjetorit nga në oficer policie në rrugën Dritan Hoxha në Tiranë. Fai i tij i vetëm ishte fakti se po qarkullonte pa maskë dhe gjatë orës policore dhe nuk i është bindur urdhërit të policit, i cili është arrestuar nga Prokuroria e Tiranës për veprën penale “vrasje e kryer në kapërcim të kufijve të mbrojtjes së nevojshme.”
Përvecc Lezhës, vrasja e Rashës ka shkaktuar protesta në Tiranë dhe Korccë, Shkodër dhe Durrës. Ndërkohë të enjten pasdite, ministri i Brendshëm, Sandër Lleshaj dha dorëheqjen.
Pas këtyre veprimeve protestuesit u rikthyen sërish para ambienteve të policisë, ku morën disa kontejner mbetjesh dhe i vendosen në hyrjen e këtij institucioni, ndërsa thyen edhe një nga xhamat e dritares të një prej zyrave të komisariatit.
Pasi qëndruan për disa minuta aty protestuesit u zhvendosen drejt sheshit Gjergj Kastrioti, duke dëmtuar disa nga koshat e mbeturinave dhe zbukurimet për festave e fundvitit dhe qëlluan me shashka e sende të ndryshme në drejtim të godinës së bashkisë.
Më pas protestuesit marshuan drejt hyrjes së qytetit të Lezhës dhe pranë rrethrrotullimit bllokuan superstradën drejt Tiranës dhe Shkodrës. Rruga qëndroi e bllokuar për rreth 20 minuta dhe më pas qytetaret e shpërndanë.
Nga bllokimi i rrugës radhe kilometrike automjetesh në të dy anët e superstradës dhe u desh ndërhyrja e policisë rrugore për normalizimin e qarkullimit.
Ndërkohë protesta e cila zgjati rreth 90 minuta u monitorua nga oficerë civil të policisë së Lezhës, të cilët nuk ndërhynë për shpërndarjen e turmës. Gjatë protestës nuk pati fjalime dhe persona të lënduar nga veprimet e dhunshme të disa prej protestuesve.