Inspektoriati i Lartë i Drejtësisë kërkon shkarkimin e gjyqtares së Krujës, Enkeleda Hoxha pas inspektimit të vendimeve për lirimet e parakohshme nga burgu të Endrit Dokles, Ilir Pajës dhe Hekuran Billës.
Inspektori i Lartë i Drejtësisë, ILD i ka dorëzuar Këshillit të Lartë Gjyqësor një kërkesë për shkarkimin e gjyqtares së Krujës, Enkeleida Hoxha, pas inspektimit të kryer mbi vendimet e lirimit të parakohshëm të tre personazheve të botës së krimit.
“Hetimi për znj. E.H. është mbyllur dhe raporti është dërguar në KLGJ me kërkesën për shkarkim,” i tha BIRN koordinatorja për të drejtën e informimit pranë ILD, Mimoza Koçiu.
Inspektori i Lartë i Drejtësisë e nisi verifikimin e gjyqtares Enkeleda Hoxha pas raportimeve në media të vendimeve për lirimin e Hekuran Billës, Ilir Pajës dhe Endrit Dokles. ILD regjistroi më pas edhe një hetim disiplinor.
Ilir Paja, i dënuar më 17 vjet burg nga Gjykata e Krimeve të Rënda, kërkoi lirim të parakohshëm në Gjykatën e Rrethit Gjyqësor Krujë tre herë brenda vitit 2017. Ndërsa dy prej kërkesave u rrëzuan, kërkesa e tretë u pranua nga gjyqtarja Hoxha.
Në janar, gjyqtarja Enkeleda Hoxha vendosi të lironte me kusht Endrit Doklen, i dënuar me burgim të përjetshëm si anëtar i Bandës së Durrësit për një sërë akuzash. Më herët, përmes 7 vendimesh të tjera, ajo i ka llogaritur Dokles kohë paraburgimi shtesë nga viti 2012 deri në vitin 2014 dhe i ka njohur atij përfitimin e 4 viteve ulje dënimi nga 3 amnisti radhazi dhe një ulje tjetër dënimi.
Në shkurt të vitit 2019, Hoxha vendosi të lirojë me kusht edhe Hekuran Billën, i cili ishte dënuar në vitin 2008 me burgim të përjetshëm në Mbretërinë e Bashkuar për një vrasje të kryer në 2006-ën.
Pas ekstradimit për vuajtjen e dënimit në Shqipëri, Gjykata e Apelit Tiranë e uli dënimin në 25 vite burg në vitin 2016 dhe në shkurt 2019, gjyqtarja Enkeleida Hoxha vendosi lirimin e tij. Një vit e gjysmë më pas, Billa u ekzekutua me armë zjarri në Tiranë.
Kjo është kërkesa e dytë e Inspektorit të Lartë të Drejtësisë për shkarkimin e një gjyqtari në detyrë. Më 10 dhjetor, KLGJ pranoi kërkesën e ILD dhe vendosi shkarkimin e gjyqtarit të Korçës, Markelian Kuqo.
