Një raport monitorimi i kryer nga Qendra për Advokim Social nxori në pah mungesat e informacionit dhe publikimit të raporteve në fushat ekonomiko-financiare dhe ato të shërbimit komunitar nga bashkia e Tiranës.
Qendra për Advokim Social në bashkëpunim me Institutin për Demokraci dhe Ndërmjetësim, IDM zhvilloi të mërkurën tryezën konsultative mbi programin e transparencës dhe llogaridhënies së Bashkisë Tiranë, për të cilën është kryer dhe një proces monitorimi gjatë periudhës gusht – shtator 2020.
Romina Sefa, drejtuese e Qendrës për Advokim Social, evidentoi si më problematike nga të shtata fushat e programit të transparencës, fushën e llogaridhënies ekonomiko-financiare, e cila shënon nivelin më të ulët të transparencës në bashkinë e kryeqytetit.
“E kemi vlerësuar me 6 nga 58 pikë këtë fushë, pikërisht për shkak se ka mungesë të theksuar të informacionit,” tha Sefa.
“Në radhë të parë mungon paketa fiskale, mungojnë gjithashtu programet buxhetore afatmesme vendore, buxheti vjetor, etj,” shtoi ajo.
Sefa nënvizoi se bashkia e kryeqyteti bënte publike informacione jo të plota mbi shërbimet që qytetarët mund të përfitojnë dhe njëkohësisht mungojnë raportet mbi marrëdhënien e bashkisë me shoqërinë civile, raportet studimore për programin e transparencës, dhe raportet mbi strukturat komunitare.
Qendra për Advokim Social është një organizatë jofitimprurëse themeluar në 2019, por aktivistët e saj angazhohen prej 5 vitesh në terren me ndihmën për advokimin e të drejtave të komunitetit Rom dhe Egjiptian, si edhe llogaridhënien e institucioneve shtetërore mbi punën që zhvillohet me këto target grupe.
Qëllimi i këtij monitorimi lidhet me përmirësimin e zbatimit të së drejtës së informimit nëpërmjet monitorimit dhe kontributit që mund të japin OSHC-të vendore në zbatimin efektiv të ligjit.
Gjetjet dhe rekomandimet e monitorimit synojnë të nxisin më tej vullnetin dhe gatishmërinë e institucioneve të pushtetit vendor për të rritur nivelin e transparencës përmes publikimit proaktiv të informacionit në Programin e Transparencës.
Sefa i tha BIRN se bashkia e Tiranës e ka detyrim ligjor publikimin e këtyre raporteve për publikun, por arsyeja e mos gjendjes së disave prej këtyre informacioneve në programin e transparencës nuk është bërë e ditur nga Bashkia.
“Rritja e transparencës së Bashkisë Tiranë është mjaft e rëndësishme për publikun, për shkak të rolit të rëndësishëm që Këshilli Bashkiak ka, si organ i brendshëm kontrollues dhe monitorues i zbatimit të politikave lokale brenda strukturës së pushtetit vendor”, u shpreh Sefa.
“Informacioni i cili gjendet ne faqet e Programit të Transparencës duhet të përditësohet në mënyrë periodike, dhe gjuha e përdorur në të duhet të thjeshtëzohet në mënyrë që të jetë i aksesueshëm edhe për qytetarët e thjeshtë pa ndonjë formim specifik profesional,” përfundoi ajo.
