Prokuroria e Posaçme ka përfunduar hetimet për tre të akuzuarit për trafikimin e 137 kg kokainë nga Ekuadori në Durrës dhe një prej të akuzuarve për krijimin e një laboratori të përpunimit të heroinës në Has.
Prokuroria e Posaçme kundër Korrupsionit dhe Krimit të Organizuar, SPAK njoftoi të premten përfundimin e hetimeve dhe paraqitjen e kërkesës për gjykim për dy çështje me katër të pandehur për trafik droge të kryer në kuadër të grupit të strukturuar kriminal.
Në njoftim thuhet se tre të pandehurit Gentian Malindi, Altin Myslihaka dhe Adrian Bega akuzohen si bashkëbunëtorë në trafikimin e një sasie kokanine, që u sekuestrua në 4 kontenierë. Kontenierët sipas prokurorisë vinin nga Ekuadori në drejtim të Shqipërisë, duke kaluar tranzit në portin e Pireut, Greqi gjatë periudhës gusht – shtator 2019. Sipas SPAK, hetimet janë zhvilluar në bashkëpunim me autoritetet greke, duke organizuar edhe dorëzimin e kontrolluar të lëndës narkotike.
Policia e Shtetit dhe ish-Prokuroria e Krimeve të Rënda njoftuan më 27 shtator 2019 finalizimin e operacionit “KUITO” me kapjen e 137 kilogramëve kokainë që vinin nga Ekuadori dhe arrestimin e dy personave dhe shpalljen në kërkim të një të treti.
Adrian Bega dhe Altin Myslihaka, njëri oficer sigurie në Portin e Durrësit dhe tjetri me profesion peshkakar, dyshohet se kishin për detyrë të nxirrnin sasinë narkotike nga kontenieri që kishte mbërritur nga Ekuadori në Pire të Greqisë, e më pas në Durrës. SPAK shprehet se hetimi vazhdon për identifikimin e personave të tjerë të përfshirë në këtë trafik.
Gjithashtu, SPAK ka dërguar për gjykim edhe një prej të akuzuarve për krijimin e një laboratori të përpunimit të drogës në Brenogë të Hasit, ku në tetor të 2018-ës u gjetën dhe sekuestruan 182.5 kg heroinë. Dy muaj më vonë u sekuestrua në Prishtinë, Kosovë edhe 113.5 kg heroinë që dyshohet të jetë përpunuar dhe trafikuar nga i njëjti grup i strukturuar kriminal.
Në njoftim thuhet se i pandehuri Fisnik Sadiku (Smaili) është bashkëpunëtor me të akuzuarit e tjerë për këtë çështje, Admir Hoxha, Xhevi Shuti, Flamur Çelaj, Vehbi Berushi, shtetasi turk Iskender Sale dhe shtetasi kosovar Xhemal Shala, të cilët janë dërguar më parë për gjykim.
