Gjykata e Kurbinit caktoi masë sigurie të arrestit në shtëpi për drejtuesen e Shërbimit të Provës në këtë rreth Lindita Lelçaj, duke iu referuar gjendjes shëndetësore. Lelçaj akuzohet për korrupsion. Avokati i saj pretendoi se për shkak të gjendjes shëndetësore ajo nuk është shprehur ende për akuzat.
Gjykata e Kurbinit vendosi të premten masë arrest shtëpie nën mbikqyrje policore, për drejtuesen e Zyrës së Shërbimit të Provës, Lindita Lelçaj. Ajo u arrestua të martën nga policia për akuzën e korrupsionit.
Seanca gjyqësore është zhvilluar në ambjentet e spitalit rajonal të Lezhës, pasi Lelçaj ka shfaqur probleme shëndetësore dhe është shtruar në spital menjëherë pas arrestimit. Prokurorja Arjola Preçi ka kërkuar që drejtuesja e Shërbimit të Provës të qëndroj në burg, por referuar gjendjes së saj shëndetësore gjyqtari Aurel Arapi vendosi një masë më të butë ndaj saj.
Avokati Edmond Buna tha se klientja e tij ka një sërë problemesh shëndetësore dhe nuk është shprehur ende për akuzat e ngritura ndaj saj dhe për këtë arsye kishte kërkuar masën e sigurisë detyrim paraqitje.
Lindita Lelçaj është vënë nën akuze për “Shpërdorim Detyre” dhe korrupsion, pasi dyshohet se manipulonte provat për persona që vuanin denimin, duke dhënë raporte verifikimi edhe për të dënuar që ishin larguar nga vendi dhe nuk raportonin pranë zyrës së saj.
Në momentin e ndalimit policia ka përdorur një agjent të infiltruar, i cili i ka ofruar drejtueses së Shërbimit të Provës një shumë parash për të kryer veprime të jashtëligjshme dhe sipas prokurorisë ajo e ka pranuar rryshfetin dhe është arrestuar në flagrancë.
Sipas prokurorisë janë mbi 10 raste të dokumentuara, ku Lelçaj ka marrë para në këmbim të vërtetimeve për persona që duhet të ishin në shërbim prove, por realisht ndodheshin jashtë Shqipërisë ose nuk paraqiteshin fare sipas vendimit të gjykatës për të mbajtur kontakte me shërbimin e provës. Pas ndalimit të saj për korrupsion Ministrja e Drejtësisë Etilda Gjonaj vendosi pezullimin e saj nga detyra.
