Gjykata e Beratit caktoi masë sigurie arrest me burg për një 44-vjeçar të akuzuar për vrasje në Goraj të Kuçovës. I akuzuarit ka pranuar krimin dhe ka shfaqur pendesë në gjykatë.
Gjykata e Beratit ka lënë në burg autorin e dyshuar të vrasjes që ndodhi ditën e enjte, në fshatin Goraj, të Kuçovës. Gjykata vendosi të cilësojë si të ligjshëm ndalimin e 44 vjeçarit Vangjel Polovina, i cili mësohet se shfaqi pendesë gjatë seancës së masës së sigurisë.
Vrasja që ndodhi të enjten ishte e para pas tre vjetësh në të gjithë qarkun e Beratit. Prokuroria beson se konflikti që përfundoi me vrasjen e 41-vjeçarit Ajet Guneli, nisi për shkak të mospagesës prej autorit të dyshuar Vangjel Polovina të disa muajve qira. Prokuroria e akuzon Polovinën për “vrasje me paramendim”. Ky i fundit pretendoi para gjykatës se ishte i penduar dhe se kishte vepruar në gjaknxehtësi e sipër.
Gjyqtari i çështjes Durim Hasa, cilësoi si të ligjshëm ndalimin e autorit të dyshuar dhe vendosi ndaj tij, masën e sigurisë “arrest me burg” për veprat penale “vrasje me paramendim” dhe “armëmbajtje pa leje” .
Shkak për ngjarjen mësohet se është bërë grindja mes Polovinës dhe pronarit të objektit Guneli, për pagesat e prapambetura të qirasë për një stallë derrash.
