Gjykata e Lezhës i ka komunikuar masën e sigurisë “Arrest me burg” Nikoll Sherrnikut, por mbrojtja pretendoi se ai kishte alibi dhe nuk kishte qenë në vendin e ngjarjes dhe njoftoi apelimin e vendimit.
Gjykata e Lezhës i ka komunikuar masën e sigurisë “Arrest me burg” Nikoll Sherrnikut, i akuzuar si i përfshirë në vrasjen e efektivit të policisë Xhulio Prela. 26-vjeçari u njoh paraditen e së martës me masen e sigurisë të dhënë në mungesë ndaj tij dhe gjykata pranoi kërkesën e prokurorisë që ai të qëndroj në burg.
Ilir Dyrzeni, avokati që mbronte të arrestuarin tha pas seancës se do të apelonte vendimin, pasi ndaj Sherrnikut nuk kishte asnjë provë. Avokati pretendoi se nuk ishte njohur me materialet e dosjes dhe se vendimi i gjykatës ishte i gabuar. Ai po ashtu pretendoi se Sherrniku kishte një alibi që mund të provohej nga 12 dëshmitarë dhe se nuk kishte qenë në vendin e ngjarjes kur ka ndodhur vrasja. “Në të vërtet është një jetë e humbur, por ai (Sherrniku) është i pafajshëm. Kur ka ndodhur ngjarja ka qenë në një darkë familjare, duke festuar ditëlindjen dhe kjo faktohet nga të paktën 12 dëshmitarë”, tha Dyrzeni.
Një dëshmi të ngjashme dha edhe vjehrri i 26-vjeçarit Astrit Gjoka, sipas të cilit natën kur ka ndodhur ngjarja 26-vjeçari ka qenë në një darkë familjare në banesën e tij dhe është larguar rreth orës 9:00 të mëngjesit të datës 5 dhjetor. Ai pretendoi se dhëndri nuk kishte asnjë njohje me përsonin tjetër të shpallur në kërkim, për vrasjen e punonjësit të FNSH-së. “Në dijeninë time ai s’ka lidhje ka qenë në shtëpinë time. Këtë e kam deklaru dhe në polici”, tha Gjoka.
Nikoll Sherrniku u vetëdorëzua në polici pasditen e 19 dhjetorit, pasi gjykata kishte vendosur ndaj tij masën e sigurisë arret në burg në mungesë si i përfshirë në vrasjen e 26-vjeçarit Xhulio Prela. Në lidhje me këtë ngjarje është shpallur në kërkim ndërkombëtar dhe shtetasi me iniciale B.M i cili dyshohet se ndodhet në Turqi.
Sipas burimeve nga policia urdhër arresti për dy të rinjtë erdhi pasi një automjet që dyshohet të jetë blerë nga Nikoll Sherrniku është përdorur nga autorët e vrasjes. As për personin tjetër nuk është e qartë si lidhet me vrasjen. Ai rezulton se ka furnizuar makinën në një karburant në Milot 10 minuta para ngjarjes.
Efektivi i FNSH-së, Xhulio Prela u ekzekutua në orët e para të mëngjesit të datës 5 dhjetor me një plumb në gjoks në Lezhë teksa po kthehej nga Shkodra për në Tiranë.