Policia e Durrësit ndaloi një 29 vjeçar i cili kishte në posedim 2 mina të lidhura me aparate celularë për shpërthim në distancë.
Policia e Durrësit ndaloi mesditën e të mërkurës një 29 vjeçar që mbante me vete 2 mina të lidhura me aparate celularë, që realizonin shpërthimin e tyre.
Sipas dyshimeve i riu me iniciale V.N. do t’i shiste 2 minat me telekomandë kundrejt vlerës 2000 euro. Ai banonte në Sukth dhe më herët ka qenë i dënuar për veprën penale “Kundërshtimi i punonjësit të policisë”.
Policia njoftoi për mediat se operacioni i koduar “Telekomanda” u realizua në bazë të informacioneve se një person lëvizte me lëndë eksplozivi me vete dhe mundën ta arrestonit në një zonë qendrore të qytetit, pranë Mauzoleumit të Dëshmorëve.
Materialet për rastin policia ja kaloi Prokurorisë së Rrethit Gjyqësor Durrës, për veprën penale “Mbajtja pa leje e armëve, armëve shpërthyese dhe e municionit”.
Ky është rasti i dytë që policia sekuestron mina me telekomandë këtë muaj. Në fillim të dhjetorit, dy persona nga Durrësi, u arrestuan në Lezhë po ashtu në posedim të dy minave me telekomandë që dyshohet se po i trafikonin për në Malin e Zi.
Bombat e telekomanduara me celularë përdoren rëndon në atentate dhe për shantazh në Shqipëri, pjesa dërrmuese e të cilave mbeten pa autorë. Vetëm në muajin e fundit policia ka identifikuar 4 raste, një në Tiranë, një në Shkodër, një në Elbasan dhe një tentativë që u zbulua para se të shpërthente në Vlorë. Atentati më i rëndë gjatë vitit të fundit ndodhi në shtator në një rrugë të populluar në kryeqytet. Atentati la të plagosur rëndë drejtuesi e mjetit në të cilin ishte vënë eksplozivi dhe një kalimtarë të rastit.