Juliana Memaj, kryetarja e Bashkisë së Dimalit, është paditur në prokurorinë e Beratit, për shpërdorim detyre një çështje pronësie nga një qytetar, por prokuroria e Beratit tha se çështja ishte përcjell në SPAK, për mungesë kompetencash.
Një banor i Njësisë Administrative Poshnje, në Bashkinë e Dimalit, ish-Ura Vajgurore, ka bërë një kallzim penal ndaj kryetares së Bashkisë, Juliana Memaj dhe dy punonjësve të zyrës së Urbanistikës në këtë bashki, Agim Çuni dhe Pandi Pilo.
Qytetari Petrit Baho, në kallzimin e bërë akuzon bashkinë e Dimalit dhe kryebashiaken Memaj, se i kanë dëmtuar biznesin e ngritur në një pronë publike të cilën ai e posedonte që prej fillimit të viteve 90’ në marrëveshje me bashkinë, me justifikimin se do të ndërtohej lulishte, por sipas tij pas prishjes prona i është kaluar një qytetari tjetër.
Kryetarja e bashkisë Memaj, dhe as institucioni që ajo drejton nuk iu përgjigjën pyetjeve për për këtë çështje deri në publikimin e shkrimit.
Sipas kallëzimit, bashkia ka cënuar pronën e familjes Baho, pas një urdhëri të firmosur nga kryebashkiakja në të cilin kërkohej lirimi i pronës pasi ajo prekej nga punime publike për një lulishte.
Më 25 nëntor, sipas kallzimit, në të njëjtën pronë kanë nisur të punohet për ndërtimin e një objekti që sipas kallëzuesit është po ashtu privat dhe jo lulishtja që ishte njoftuar. Sipas kallëzimit, punimet për lulishte nga ana e Bashkisë, nuk kanë pasur si qëllim zgjerimin e hapësirave publike, por të favorizonin personin tjetër, me të cilin kallëzuesi pranon se ka pasur një konflikt pronësie.
Kallëzuesi pretendon se kryebashkiakja Memaj, Agim Çuni dhe Pandi Pilo, kanë shpërdoruar detyrën dhe kanë shkatërruar pronën private.
Në një urdhër të bashkisë për lirimin e pronës publike të zënë të cilin BIRN e ka, bashkia i kërkon kallëzuesit të lirojë pronën, pasi ajo bllokonte rrugën hyrëse për në objektin pronë e bashkisë i identifikuar aty si “Ish-Kopështi”.
Pas marrjes së këtij kallëzimi, burime nga prokuroria e Beratit thanë se kallëzimi ishte trasferuar në Strukturën e Posaçme Anti Korrupsion, SPAK, për shkak të kompetencave. “Kallëzimi është objekt i SPAK”, thanë zyrtarë të prokurorisë.