Zyrtarë dhe kryetarë partish politike bënë homazhet e tyre për presidentin e parë të Kosovës pas luftës, Ibrahim Rugova, i cili vdiq në janar 2006.
Presidentja në detyrë e Kosovës Vjosa Osmani bëri homazhe në varrin e Ibrahim Rugovës në Prishtinë, duke u shprehur se rruga që ai hapi “mbetet një udhëzues i përhershëm” për Kosovën.
I quajtur babai pacifist i pavarësisë së Kosovës, Rugova humbi betejën e tij me kancerin e mushkërive në janar 2006 kur po shërbente mandatin e tij të dytë si president. Në atë pikë, ai po merrte pjesë në negociatat e drejtuara nga OKB-ja me Serbinë rreth statusit të ardhshëm të Kosovës, që çoi në shpalljen e pavarësisë në shkurt 2008.
“Ai ishte një njeri që i bashkoi shqiptarët e Kosovës rreth idesë së lirisë dhe pavarësisë dhe dinte të krijonte ura të forta miqësie me shtetet që ende na mbështesin”, tha Osmani.
Kreu i partisë politike Vetëvendosje, Albin Kurti, bëri gjithashtu i bëri homazhe metodave paqësore të Rugovës në periudhën e trazuar të viteve 1990.
“Ne përkujtojmë vendosmërinë e tij politike dhe angazhimin e tij institucional, si dhe qetësinë dhe durimin e tij njerëzor”, tha Kurti.
Rugova udhëhoqi Lidhjen Demokratike të Kosovës, LDK, që nga themelimi i saj në vitin 1989 deri në vdekjen e tij, dhe pasardhësi i tij, Isa Mustafa, foli gjithashtu për trashëgiminë e tij politike.
” Sot jam këtu për të shpreh qëndrimin dhe përkushtimin e LDK-së të ecim në rrugën që e ka trasuar dhe lënë trashëgimi presidenti Rugova dhe për të thënë se askush nuk mund ta trashëgojë këtë rrugë përpos LDK-së”, tha Mustafa.
Rugova lindi më 2 dhjetor 1944 në fshatin Cerrcë, në komunën perëndimore të Istogut.
Në vitet 1976-1977, ai studioi nën mbikëqyrjen e Roland Barthes në Paris, ku zhvilloi interesat e tij shkencorë në letërsi me një fokus në teorinë letrare.
Ai themeloi LDK-në në vitin 1989 si një lëvizje e gjerë e cila udhëhoqi institucionet “paralele” të Kosovës në vitet 1990, pasi lideri serb Sllobodan Millosheviç kishte shfuqizuar statusin autonom të Kosovës.
Pasi Beogradi vendosi sundimin e drejtpërdrejtë, Rugova u zgjodh jo zyrtarisht si president i Kosovës për dy mandate.
Kur NATO-ja nisi sulmet ajrore në një përpjekje për ta detyruar Millosheviçin të tërhiqte forcat policore, ushtarake dhe paraushtarake serbe nga Kosova në mars 1999, policia hyri në shtëpinë e Rugovës në Prishtinë dhe e vendosi atë dhe familjen e tij në arrest shtëpie.
Pas më shumë se një muaj, Rugova dhe familja e tij u lejuan të largoheshin për në Itali. Ai u kthye në shtëpi në Kosovë pas përfundimit të luftës, në korrik 1999.
Ai u zgjodh zyrtarisht president nga parlamenti në vitin 2002 dhe u rizgjodh në vitin 2005.
