Gjykata e Posaçme shpalli dënimet për anëtarët e bandës së Avdulajve të Shijakut dhe të pandehurve të tjerë të akuzuar për krijimin e laboratorit të heroinës në Brenog të Hasit, duke i deklaruar të gjithë fajtorë.
Gjykata e Posaçme për Korrupsionin dhe Krimin e Organizuar shpalli mbrëmjen e të hënës vendimin përfundimtar për 17 të pandehurit si bashkëpunëtorë në krijimin e laboratorit të përpunimit të heroinës në fshatin Brenog të Hasit që u zbulua në tetor të 2018-ës gjatë operacionit “VOL-VO4”, në kuadër të hetimit të çështjes së quajtur “dosja 399”.
Gjykata i shpalli fajtorë të 17 të akuzuarit, disa prej të cilëve anëtarë të grupit të Avdulajve të Shijakut dhe i dënoi në total me 126.6 vite për “grup të strukturuar kriminal”, “trafik të narkotikëve”, “prodhim dhe shitje të lëndëve narkotike” dhe “pastrim parash”.
Hetimet për këtë grup nisën në vitin 2016 për dyshimet për trafik droge por përgjimet e grupit kriminal dhe bashkëpunëtorëve të tyre në Durrës, Kavajë, Lezhë dhe Dibër, zbuluan mes të tjerash një angazhim të të dyshuarve jo vetëm në trafikun e drogës por edhe në mbështetjen e zyrtarëve të ndryshëm socialistë në fushatat e tyre zgjedhore në zgjedhjet e parakohshme në Dibër në 11 shtator 2016 si dhe më pas, në zgjedhjet e përgjithshme parlamentare të vitit 2017.
Bashkë me të dyshuarit për trafik, ranë në pranga edhe ish-deputeti socialist Arben Ndoka dhe vëllai i tij Gjevi Ndoka, si dhe ish-Drejtori i Përgjithshëm i Burgjeve, gjithashtu ish-deputet socialist, Arben Çuko.
Në kuadër të këtij procedimi, Prokuroria e Posaçme për Korrupsionin dhe Krimin e Organizuar, SPAK ka dërguar për gjykim rreth 63 të pandehur. Një nga të dyshuarit, turku Nejdet Cesuroglu u gjet i vdekur në Prishtinë, në janar të vitit 2019.
Dënimin më të lartë, me 12 vjet burg, gjykata e dha për të akuzuarin si një prej ideatorëve të krijimit të laboratit në Has, Admir Hoxhën. Gjithashtu, u vendos edhe konfiskimi i hotelit “Ador” në pronësi të Hoxhës dhe 6 automjete. I pandehuri Altin Avdyli u dënua me 6 vjet e 8 muaj burgim, ndërsa Hekuran Hoxha me 10 vjet e 8 muaj.
Dënimet ndaj 17 të pandehurve:
- Gjevi Ndoka me 8 vjet e 8 muaj burgim
- Altin Avdyli me 6 vjet e 8 muaj burgim
- Esat Mehmeti me 10 vjet burgim
- Petrit Suljemani me 8 vjet e 8 muaj burgim
- Sajmir Sulejmani me 8 vjet burgim
- Hajri Seferi me 10 vjet e 8 muaj burgim
- Orges Jahoelezi me 6 vjet e 8 muaj burgim
- Shkëlqim Avdyli me 4 vjet e 8 muaj burgim
- Mario Zeqiri me 4 vjet e 8 muaj burgim
- Elton Shehaj me 4 vjet e 8 muaj burgim
- Ardit Gjyriqi me 4 vjet e 8 muaj burgim
- Admir Hoxha me 12 vjet burgim
- Hekuran Hoxha me 10 vjet e 8 muaj burgim
- Vehbi Berushi me 8 vjet burgim
- Anila Shuti me 2 vjet burgim (zëvendësuar me 25 muaj shërbim prove)
- Xhavit Shyti me 8 vjet burgim
- Flamur Çela me 8 vjet burgim
