Mimi Kodheli, ish-ministre e Mbrojtjes në mandatin e parë të qeverisë “Rama” deklaron pasuri familjare me vlerë 19.8 milionë lekë në fund të vitit 2018.Mimi Kodheli u zgjodh ministre e Mbrojtjes në kabinetin e kryeministrit Edi Rama pas zgjedhjeve parlamentare të vitit 2003 dhe u largua nga qeveria në shtator 2017.
Mimi Kodheli është Doktorante e Shkencave Ekonomike nga Universiteti i Veronës, Itali, në bashkëpunim me Universitetin e Tiranës, Fakulteti Ekonomik, prej vitit 2007. Ka një Master në Administrim Biznesi nga Universiteti i Lincoln, Nebraska, SHBA në bashkëpunim me Universitetin e Tiranës prej vitit 2000, si dhe është diplomuar në Universitetin e Tiranës, Fakulteti Ekonomik, Dega Financë në vitin 1986.
Znj. Kodheli ka hyrë në politikë në vitin 2002, kur edhe u bë nënkryetare e Bashkisë së Tiranës. Në vitin 2005, ajo u emërua prefekte e Qarkut të Tiranës dhe prej vitit 2009 është deputete e Kuvendit të Shqipërisë. Prej 4 vitesh, Znj. Kodheli drejton Komisionin për Politikën e Jashtme.
Ky raport është prodhuar nga BIRN pas administrimit të deklaratave të pasurisë së ish-ministres Mimi Kodheli nga Inspektoriati i Lartë i Deklarimit dhe Kontrollit të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e anëtarëve apo ish-anëtarëve të Këshillit të Ministrave gjatë viteve 2013-2020.
Skeda grafike e mëposhtme paraqet pasurinë e deklaruar nga ish-ministja e Mbrojtjes, Mimi Kodheli nga viti 2005 deri në fund të vitit 2018. [Kliko për skedën në PDF]
Në deklaratën e parë të dorëzuar në ILDKPKI në vitin 2005, Mimi Kodheli deklaronte pasuri familjare me vlerë 7.8 milionë lekë, ndërsa në fund të vitit 2018, pasuria familjare kap vlerën e 19.8 milionë lekëve.
Znj. Kodheli deklaron familjarisht pasuri të patundshme me vlerë 7.5 milionë lekë, likujditete bankare prej 5.4 milionë lekësh dhe automjete me vlerë 6.8 milionë lekë.
Të ardhurat familjare për periudhën deklaruese janë 38.4 milionë lekë, nga të cilat rreth 48% burojnë nga paga e Znj. Kodheli dhe 19% nga pagat e familjarëve. Rreth 30% e të ardhurave totale familjare deklarohen si të realizuara gjatë periudhës 2005-2009, kur Znj. Kodheli nuk ishte subjekt deklarues.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrollin aritmetik/logjik për 10 vite të deklarimit, asnjëra prej deklaratave nuk rezultoi me probleme.
Nga analiza cilësore e deklaratave të pasurisë, vlen për t’u theksuar se Mimi Kodheli ka një shkëputje të deklarimeve nga viti 2005 deri në vitin 2009, kur zgjidhet deputete në Kuvendin e Shqipërisë. Mes të ardhurave të siguruara për vitet 2005-2009, të cilat deklarohen si burime për asetet e shtuara në të njëjtën periudhë, Znj. Kodheli deklaron edhe një bursë studimi, PhD në Itali në vlerën e 31,500 eurove.
Analiza e pasurisë së Znj. Kodheli nuk përfshin një llogari bankare dyemërore, që sipas deklarimit i përket nënës së subjektit, me vlerë fillestare prej 21,554 dollarësh, e cila ndër vite shtohet ose pakësohet.
Deklarata e pasurisë së vitit 2005
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Deklarata e pasurisë së vitit 2018
Për më shumë dokumente vizitoni databazën tonë dokumente.reporter.al
