Policia në Stamboll tha se ata kishin kapur 104 studentë pas protestave të studentëve të martën, pasi ndaluan 159 të tjerë të hënën – me një ministër qeveritar që i denoncoi ata si “terroristë” dhe “fashistë”.
Policia e Stambollit të mërkurën tha se ndaloi 104 studentë të përfshirë në protesta masive në Kadikoj dhe Beshiktas, të cilat u shpërndanë pas ndërhyrjes së policisë.
Nga ky numër, 76 janë liruar pas marrjes në pyetje dhe 10 të tjerë janë lënë në arrest shtëpie. Marrja në pyetje nga policia vazhdon ende.
Të hënën, policia ndaloi 159 studentë të tjerë pasi bastisi kampusin e Universitetit Bogazici në Stamboll, ku studentët po protestonin kundër rektorit të ri të emëruar, i cili është një anëtar i Partisë qeverisëse Drejtësi dhe Zhvillim të presidentit Rexhep Tajip Erdogan.
Pasi i shpërndau protestuesit, qeveria nuk tregon asnjë shenjë pajtimi. Përkundrazi, ministri i brendshëm Suleyman Soylu tha në një intervistë televizive të martën se ata ishin një grup i vogël “terroristësh” dhe “fashistësh”.
Soylu u zotua se nuk do t’i lejojë studentët të pushtojnë zyrën e rektorit. “Unë nuk do ta lejoja këtë edhe nëse Universiteti Bogaziçi do të përfshihej në një trazirë. Edhe nëse e gjithë Turqia do të përfshihej nga trazirat”, tha ai. Studentët kanë thënë se ata nuk bënë asnjë përpjekje dhe nuk kishin asnjë plan për të pushtuar zyrën e rektorit, megjithatë.
Nënkryetari i AKP-së në pushtet, Mahir Unal, ndërkohë i ka quajtur protestat “anarkizëm”, duke këmbëngulur se AKP-ja përfaqëson vullnetin e popullit turk dhe se do ta mbrojë këtë vullnet “deri në vdekje”.
Gjatë muajit të kaluar, studentë dhe akademikë në Universitetin Bogazici kanë demonstruar kundër emërimit të rektorit të ri, Melih Bulu, të cilit iu dha posti më 1 janar nga presidenti Erdogan. Ata po i bëjnë thirrje rektorit të japë dorëheqjen dhe kërkojnë të drejtën për ta zgjedhur vetë rektorin e tyre.
Në shtypjen që pasoi një përpjekje të dështuar për grusht shteti në 2016, qeveria e Erdoganit anuloi zgjedhjet për rektor me dekret presidencial. Erdogan që atëherë i ka emëruar vetë rektorët e universiteteve. Kritikët thonë se ai po përpiqet të kontrollojë akademinë dhe të heshtë zërat kritikë në të si pjesë e një goditjeje më të gjerë.
Bogazici është një nga universitetet më të mira në Turqi dhe shpesh është quajtur edhe “Harvardi Turk”.
