Gjykata e Dibrës pranoi kërkesën e prokurorisë për të dërguar për gjykim katër prej të akuzuarve si pjesë e skemës së manipulimit të zgjedhjeve lokale të vitit 2016, ndërsa pushoi hetimin për të akuzuarit për blerje vote për shkak të parashkrimit të veprës penale.
Gjykata e Dibrës pranoi të premten kërkesën e prokurorisë për të nisur gjykimin për katër të pandehur, pjesë e skemës së manipulimit të zgjedhjeve të vitit 2016 në Dibër.
Në gjyq do të shkojnë ish-shefi i komisariatit Robert Aga, i cili akuzohet për “shpërdorim detyre”, ish-drejtori i Zyrës Arsimore Drini Gjeci, në akuzë për “shpërdorim detyre” dhe “shantazh të zgjedhësve”, Hasan Hoti, ish-Administrator i Lurës, për “shpërdorim detyre” dhe Nuri Meda, ish-Administrator i Tominit, që akuzohet për kanosje të zgjedhësve më shumë se njëherë dhe shpërdorim detyre.
Në të njëjtën ditë Gjykata e Rrethit Gjyqësor Dibër ka pushuar çështja për kryetarin aktual të Bashkisë Dibër, Dionis Imerajn dhe Korab (Imer) Lala, Afrim Mikli, Arben Keshi dhe Bekim Krashi, të akuzuar për blerje të votës.
Sipas prokurorisë, pavarësisht se është provuar shitblerja e votave në Dibër, asnjë prej të hetuarve nuk do të mbajë përgjegjësi penale, pasi për shkak të kohës së kaluar, krimi është parashkruar me kaloimin e afatit 3-vjeçar të ndjekjes penale. Mbrojtësit e katër të pandehurve që u dërguan në gjykim, kërkuan që dosja të pushohej edhe për ta duke pretenduar se prokuroria nuk kishte prova.
Ndërkohë avokati Indrit Sefa, përfaqësuesi i Partisë Demokratike e cila ishte palë në proces si kallëzuese, tha pas përfundimit të seancës se Gjykata dështoi të japë drejtësi dhe të zbatojë ligjin duke legjitimuar veprimet e paligjshme të prokurorit të Prokurorisë së Rrethit Gjyqësor Dibër. “Fakti që të gjithë palët në sistemin e drejtësisë duke filluar nga gjykata e prokurori, nxitojnë për t’i vënë një kapak kësaj historie është më kriminal se sa vepra penale e kryer nga këta persona,” – u shpreh Sefa, i cili pati kërkuar përjashtim të trupës gjykuese dhe njohje me materialet audio të përgjimeve.
Sefa tha se vendim do të ankimohej menjëherë pranë Gjykatës së Apelit Tiranë, pasi konsiderohet një vendim i padrejtë.
Dosja 184, me përgjime që implikonin 11 persona në tjetërsimin e rezultatit të zgjedhjeve të pjeshme lokale në Dibër në vitin 2016, u dërgua në gjykatë në fund të vitit që shkoi, pasi u mbajt për një kohë të gjatë në sirtarët e Prokurorisë së Krimeve të Rënda dhe më pas ndërroi disa herë duar prokurorësh duke e kthyer në një ping-pong mes Prokurorisë së Krimeve të Rënda dhe Prokurorisë së Dibrës për çështje të kompetencës.
Dosja 184 sëbashku me dosjen tjetër me nr.339, që i përket hetimeve të një organizata kriminale në Durrës të përfshirë po ashtu sipas prokurorisë në blerje votash dhe shatazh zgjedhësish, u bënë shkak për bojkotin e parlamentit dhe më pas edhe të zgjedhjeve lokale nga opozita, duke futur vendin në një nga krizat më të thella politike.
