Dëbora ka bllokuar dhjetra fshatra në zonën e Dibrës, ndërsa probleme janë krijuar edhe në lagje të Bulqizës duke bllokuar bizneset dhe lëvizjen në qytet.
Temperaturat e ulëta, erë e fortë me reshje dëbore ka përfshirë Dibrën që prej mëngjesit të së shtunës. Kjo situatë ka krijuar probleme të shumta në fshatra, por edhe në qytete ndërsa dhjetra rrugë janë të bllokuara dhe disa zona janë pa energji elektrike.
Myzafer Lazri, banor i Lagjes së vjetër në qytetin e Bulqizës, i cili ka një furrë buke tregoi se të dielën nuk mundi të shpërndajë bukën pasi rrugët e qytetit kanë qenë të bllokuara. “Këtu nuk ke as pushtet qendror dhe as lokal. Ka shku bora një metër nuk e ça kokën kush me nxjerrë fadromat me e hap e me hedh kripë”, shprehet ai.
Trashësia e borës në fshatra shkon deri në 50 cm, ndërsa në Bulqizë dhe Dibër deri në 30 cm.
Sipas Autoritetit Rrugor Shqiptar, reshjet nuk kanë sjellë probleme në qarkullim, por rekomandohet që në akset Qafë Bualli-Krastë dhe Ura e Çerenecit-Klenjë, kalimi të bëhet me zinxhirë.
Prefekti i Dibrës, Nexhbedin Shehu në një bisedë telefonike për BIRN u shpreh se deri më tani rrugët nacionale janë të hapura. “Edhe rrugët rurale, përjashtuar ekstremet, siç është Lura që edhe në këto momente ka stuhi bore. Furnizimi me energji është i plotë me përjashtim të 5 fshatrave në Kala të Dodës dhe Lura.” u shpreh Shehu.
Shehu tha se në qytete janë pastruar rrugët dhe është hedhur kripë. “Punën e bashkive për menaxhimin e kësaj situate e vlerësojë shumë mirë”, tha Shehu.
Por rrugët e brendshme në qytetin e Bulqizës vazhdojnë të mbeten të bllokuara nga bora. Situatë më e vështirë paraqitet në fshatra, që janë të izoluara. Flamur Jella, drejtues i Emergjencave Civile në Bashkinë e Bulqizës në një bisedë telefonike për BIRN, u shpreh se fshatrat Tërnovë e madhe dhe e vogël janë të izoluara, pasi trashësia e borësh shkon deri në 60 cm. “Rruga nacionale nga qafa e Buallit deri në Krastë është e hapur. Ndërsa nga qendra e Krastës e nëpër fshatra rruga është e bllokuar”, tha ai.
Në njoftim të DVP Dibër për mediat, bëhej me dije se në territorin e bashkisë Bulqizë janë të bllokuara njësitë administrative Trebisht, Ostren dhe rrugët e fshatrave me qendrën administrative në Martanesh, Zerqan e Shupenzë. Në territorin e bashkisë Dibër, të bllokuara rrugët që të çojnë në njësitë administrative Selishtë, Lurë, Reç dhe rrugët e fshatrave që lidhen me njësitë administrative Zalldardhë, Kala e Dodës.
Situata paraqitet më ndryshe në Klos dhe Mat, ku e bllokuar është rruga për në njësinë administrative Xibër, dhe rrugët e fshatrave që lidhen me qendrën në njësitë Gurrë dhe Suç. Sipas DVP Dibër, janë të bllokuara rrugët e fshatrave që të lidhin me qendrën administrative Macukull, Baz e Lis, ndërsa rrugët kryesore të fshatrave Lis e Derjan, lëvizet me zinzhir.
