Shumica socialiste e Komisionit të Ankesave dhe Sanksioneve shfuqizoi dy gjoba të Komisionerit ndaj kryebashkiakut të Tiranës Erion Veliaj pasi pranoi një interpretim akrobatik juridik të dhënë nga avokati i socialistëve, sipas të cilit, Veliaj nuk ka shpërndarë dokumente pronësie dhe Facebooku i tij është personal.
Shumica socialiste e Komisionit të Ankesave dhe Sanksioneve i dha një fitore të dytë Partisë Socialiste të martën pasi rrëzoi dy gjoba me vlerë totale 75000 lekë ndaj kryetarit të Bashkisë Tiranë Erion Veliaj për shkelje të kodit zgjedhor.
Veliaj u gjobit nga komisioneri Ilirjan Celibashi javën e kaluar për shkak se në shkelje të kodit zgjedhor, publikoi materiale propagandistike, në të cilat shfaqej duke dorëzuar dokumente dhe çelësa te familjet që pësuan dëme nga tërmetet e vitit 2019 në rrethinat e Tiranës.
Sipas relatorit Koli Bele, KAS, “bazuar në shqyrtimin e fakteve dhe provave, me shumicë votash” vendosi rrëzimin e gjobave.
Kodi zgjedhor ndalon qeverinë apo pushtetin vendor që të shfrytëzojë infrastrukturën shtetërore për zgjedhje, mes të cilave, të japë certifikata pronësie apo leje legalizimi, një praktikë e shëmtuar e politikës shqiptare, ku qytetarëve u jep funksionari partiak atë dokument që u takon me ligj dhe që në vendet me shtet të së drejtës përbën një akt administrativ krejtësisht të parëndësishëm.
Por ndryshe nga sa ka pretenduar Veliaj në videot e shpërndara në media, avokati i socialistëve në KQZ Eridian Salianji deklaroi se Veliaj në fakt nuk ka shpërndarë dokumente pronësie. Ai i përshkroi dokumentet e dhëna si “procesverbale për dorëzim të objektit” ndërsa pranoi se kryebashkiaku duhet të ketë bërë “lapsus” kur i cilësoi dokumentet e dorëzuara si “dokument pronësie” apo “dokument shtëpie”.
“Nuk ka dokumente pronësie të shpërndara nga kryetari i Bashkisë,” deklaroi Salianji para KAS. “Ligji ndalon shpërndarjen e certifikatave të pronësisë dhe lejeve të legalizimit, por jo inspektimet dhe procesverbalet e dorëzimit të objekteve,” deklaroi ai më tutje.
Një përfaqësues i opozitës vërejti se si, në mënyrë të përsëritur, Veliaj dhe Bashkia Tiranë, i është referuar dokumenteve në fjalë si “dokumente pronësie”.
Ai citoi kronikat e transmetuara nga Veliaj të cilat i përshkruan aktivitetet e tij si “dorëzuan dokumentet e pronësisë,” “morën në duar dokumentat e pronësisë për banesën e sapondërtuar,” apo “pas tërmetit shkatërrues morën pronësinë e banesës së ndërtuar”.
Salianji argumentoi më tutje se aktiviteti i Veliajt në shpërndarjen e këtyre dokumenteve “nuk është publik” dhe se faqja e tij në Facebook është “private”.
Sipas Salianjit, aktivitetet e Veliajt “nuk janë të ndaluar” pasi “nuk janë kryer me pjesëmarrje të medias në mënyrë të hapur.”
“Aktivitetet nuk kanë qenë të hapura për publikun dhe nuk kanë pasur qëllime informimi. Është hedhur në Facebookun e tij personal dhe pastaj media e ka transmetuar,” deklaroi ai.
KQZ, e cila ka pyetur mediat që kanë përcjellë informacionet e Veliajt, ka marrë si përgjigje nga së paku një media se materjalet në fjalë i janë dërguar asaj nga zyra e shtypit e Bashkisë Tiranë.
Por KAS, i cili përbëhet nga Elvin Lako, Elvis Çefa, Ilirjan Rusmali, Koli Bele dhe Ledio Braho, vendosi me shumicë votash që të pranojë argumentet e Partisë Socialiste dhe të shfuqizojë gjobat ndaj Veliajt.
