Policia e Durrësit arrestoi 2 persona të cilëve u sekuestroi 4 mina me telekomandë të lidhura me aparate celularë për shpërthim në distancë, të cilat do t’i shisnin tek persona të tjerë.
Policia e Durrësit njoftoi të martën se arrestoi 2 persona të cilëve i sekuestroi 4 mina me telekomandë të lidhura me aparate celularë për shpërthim në distancë, të cilat do t’i shisnin tek persona të tjerë.
Sipas policisë 2 burrat u kapën në përpjekje për t’i trafikuar minat me shpërthim në distancë.
“Arrestohen në flagrancë 2 shtetas me precedent të mëparshëm penal, të cilët do i shisnin minat kundrejt fitimit deri në 3000 euro për një copë”, njoftoi policia për mediat.
2 të arrestuarit, 46 vjeçari me iniciale A. G., ishte i dënuar më parë për veprën penale “Ndërtim pa leje”, ndërsa 35 vjeçari me iniciale B. G., ishte i dënuar më parë për veprën penale “Armëmbajtja pa leje”.
Policia në banesën e shtetasit 35 vjeçar sekuestroi edhe një sasi të vogël lënde narkotike “Cannabis Sativa”. Rasti i trafikimit të minave me telekomandë nuk është i izoluar.
Më 23 dhjetor të vitit 2020 Policia e Durrësit ndaloi një 29 vjeçar i cili kishte në posedim 2 mina të lidhura me aparate celularë për shpërthim në distancë, të cilat do t’i shiste tek persona të tjerë.
Operacioni i sotëm është rasti i treti brenda pak 4 muajsh ku Policia e Durrësit sekuestron mina me telekomandë. Ndërsa në fillim të dhjetorit që lamë pas dy persona të tjerë nga Durrësi u arrestuan në Lezhë për posedim të dy minave me telekomandë që dyshohet se po i trafikonin për në Malin e Zi.
Bombat e telekomanduara me celularë po përdoren rëndon në atentate dhe për shantazh në Shqipëri, teksa vetëm javët e fundit numërohen disa raste në Fushë-Krujë, Kamëz dhe Tiranë.
Një shpërthim eksplozivi ndodhi mbrëmjen e 12 marsit, ku objekt i sulmit në kryeqytet ishte automjeti privat i prokurorit Arjan Muça. Policia dyshon se sulmi është një formë paralajmërimi për prokurorin apo bashkëshorten e tij gjyqtare, e cila gjithashtu e përdorte automjetin.
