Inspektori i Lartë i Drejtësisë, Artur Metani i kërkon Këshillit të Lartë të Prokurorisë shkarkimin nga detyra të prokurorit të Krujës Bujar Memia, duke argumentuar se me mosankimin e tij, ka lejuar që vendimi për lirimin me kusht të Hekuran Billës, të mos kontrollohet nga gjykatat më të larta.
Inspektori i Lartë i Drejtësisë, ILD i kërkon Këshillit të Lartë të Prokurorisë, KLP shkarkimin nga detyra të prokurorit të Krujës, Bujar Memia lidhur me qëndrimin e tij pasiv ndaj vendimit të gjykatës për lirimin me kusht të të dënuarit Hekuran Billa, i cili u ekzekutua më 11 qershor të 2020-ës.
“Pasiviteti dhe mosveprimi i prokurorit për të kontrolluar ligjshmërinë e kësaj vendimarrje ndikoi në uljen e besimit publik tek sistemi gjyqësor, dhe nxiti hakmarrjen ndaj të dënuarit”, citohet në njoftimin e shpërndarë nga këshilltarja për mediet pranë ILD, Mimoza Koçiu.
Avokatët e Prokurorit po ashtu paraqitin qëndrimet e tyre në seancë e zhvilluar virtualisht, por ato nuk ishin publike deri në publikimin e këtij shkrimi.
Billa, i cili ishte dënuar për vrasje në Mbretërinë e Bashkuar, u vra në një atentat pak kohë pasi u la i lirë nga Gjykata e Krujës.
Për të njëjtën çështje është duke u gjykuar nga KLGj kërkesa e ILD për shkarkimin nga detyra të gjyqtares Enkeleida Hoxha, e cila vendosi lirimin me kusht të Hekuran Billës, i dënuar me burgim të përjetshëm në Mbretërinë e Bashkuar për një vrasje të kryer në 2006-ën.
Në njoftim thuhet se Inspektori i Lartë i Drejtësisë, Artur Metani parashtroi gjatë seancës plenare të zhvilluar online nga KLP argumentet e hetimit disiplinor të nisur ndaj prokurorit Memia. Metani ka shpjeguar se pas verifikimit të fakteve të bëra publike në medie për vrasjen e Hekuran Billës në qershor të 2020-ës, një muaj më vonë ka urdhëruar nisjen e hetimit me iniciativë ndaj prokurorit Memia për “shkelje të rënda profesionale që diskretitojnë pozitën dhe figurën e prokurorit gjatë ushtrimit të detyrës”.
Metani konstaton se Memia, në mënyrë të pajustifikuar, nuk ka përmbushur detyrën gjatë dhe pas gjykimit për lirimin me kusht të hekuran Billës, që kanë sjellë përfitim të padrejtë dhe në kundërshtim me ligjin për palët në proces. Sipas ILD, Memia nuk ka respektuar ligjin material dhe atë procedurial penal në mënyrë të vazhduar.
“Këto veprime/mosveprime të tij janë kryer në mënyrë të drejtpërdrejtë, të vazhduar, të vullnetshme dhe të pajustifikuar në 4 procese gjyqësore”, shprehet ILD.
Metani shprehet se ushtrimi i parregullt i detyrës nga ana e prokurorit Memia ka sjellë pasoja për dhënien e drejtësisë; ka cënuar cënuar besimin e prestigjit jo vetëm të gjykatës, por dhe të prokurorisë, duke cenuar besimin e publikut te drejtësia.
Në përfundim të parashtrimeve të tij, Metani i kërkoi KLP shkarkimin nga detyra të prokurorit Bujar Memia.
