Këshilli i Lartë Gjyqësor vendosi pranimin e kërkesës së Inspektorit të Lartë të Drejtësisë për shkarkimin nga detyra të gjyqtares së Krujës Enkeleida Hoxha ndaj të cilës u nis procedim disiplinor për lrimin me kusht të dy të dënuarve për krime të rënda.
Këshilli i Lartë Gjyqësor, KLGj shpalli të mërkurën vendimin për shkarkimin nga detyra të gjyqtares së Krujës Enkeleida Hoxha, ndaj të cilës nisi më parë procedim disiplinor Inspektori i Lartë i Drejtësisë, ILD për shkak të lirimeve të dy të dënuarve për krime të rënda.
Në seancën e të mërkurës ishin të pranishëm Inspektori Artur Metani, gjyqtarja Enkeleida Hoxha dhe përfaqësuesi i saj ligjor, Ardian Visha. Kryetarja e KLGJ-së, Naureda Llagami deklaroi në fillim të seancës se Këshilli, pas vlerësimit me kujdes të qëndrimeve të palëve, vendosi të pranojë kërkesën e ILD për masën disiplinore shkarkim nga detyra të magjistrates Enkeleida Hoxha. Gjithashtu, Llagami bëri me dije pezullimin e pagës së gjyqtares Hoxha me 50% deri sa vendimi të marrë formë të prerë.
Këshilli i Lartë i drejtësisë, KLGj u njoh të enjten me 11 mars, me konkluzionet përfundimtare të Inspektorit të Lartë të Drejtësisë, Artur Metani lidhur me procedimin disiplinor ndaj gjyqtares së Krujës, Enkeleida Hoxha, si edhe me qëndrimin e kësaj të fundit.
ILD kërkoi shkarkim e Hoxhës për shkak të vendimeve të lirimit të Hekuran Billës – i dënuar me burgim të përjetshëm në Mbretërinë e Bashkuar për një vrasje të kryer në 2006 si dhe të lIlir Pajës, i dënuar nga ish-Gjykata e Krimeve të Rënda me 17 vjet burg.
Inspektori i Lartë i Drejtësisë, Artur Metani tha në seancën parardhëse se, nga hetimi i kryer rezulton e provuar se nga Enkeleida Hoxha janë ndërmarrë veprime dhe mosveprime, të cilat kanë të bëjmë me mosrespektim të rëndë dhe të vazhduar të legjislacionit material dhe procedural penal.
Ai theksoi se nga ana e Hoxhës nuk janë marrë prova vendimtare për zgjidhjen e çështjes, duke cenuar parimin e paanësisë së gjykimit. Sipas ILD, ajo u ka atribuuar të dënuarve gjatë periudhave të njëjta dhënien e cilësive të ndryshme, herë si i paraburgosur dhe herë si i dënuar. Gjithashtu, Metani shtoi se Hoxha nuk ka respektuar kriteret ndaluese për përfitim amnistie dhe se është konstatuar një mungesë thelbësore në arsyetimin e vendimeve gjyqësore.
Duke i vlerësuar veprimet dhe mosveprimet e ndërmarra nga ana e magjistrates Enkeleida Hoxha se kane cenuar besimin që magjistrati duhet të përcjellë te publiku në përmbushjen e misionit dhe rolit të tij në dhënien e drejtësisë; se kanë diskretituar rëndë figurën dhe pozitën e gjyqtarit dhe kanë ulur dinjitetin e organit që përfaqëson, Metani kërkoi largimin e saj nga detyra.
Gjyqtarja Enkeleida Hoxha i kundërshtoi gjetjet dhe qëndrimet e ILD duke argumentuar se vendimet e saj për lirimin e të dënuarve nuk kishin sjellë asnjë pasojë.
Ndërsa përfaqësuesi i saj ligjor, avokati Ardian Visha e konsideroi procesin ndaj Hoxhës si një sulm politik. Ai solli në vëmendje deklartat e Ministres së Drejtësisë dhe Kryeministrit Rama duke pretenduar se gjeneza e shkeljeve të pretenduara ishte sulmi politik i kryer ndaj gjyqtares Hoxha.
Edhe avokati Visha këmbënguli se në raportin e ILD nuk gjendej kurrkund një fjalë të vetme lidhur me pasojën që kishte sjellë lirimi me kusht i dy të dënuarve.
Aktualisht, gjyqtarja Enkeleida Hoxha gjendet në paraburgim prej 11 shkurtit, kur u arrestua bashkë me 11 persona të tjerë si pjesë të një strukture kriminale që synonte të lironte disa të dënuar që e vuajnë dënimin në burgun e sigurisë së lartë në Fushë-Krujë, kundrejt përfitimeve monetare.
