Policia e Mirditës njoftoi se kishte arrestuar një prej banorëve të Thirrës dhe tre aktivistë të Vetëvendosjes nga Kosova, pas protestës kundër një hidrocentrali. LVV i cilësoi arrestimet përpjekje për frikësim.
4 persona janë arrestuar dhe 30 të tjerë u proceduan penalisht në gjendje të lirë, pas protestës së zhvilluar paraditen e së dielës në Thirrë të Mirditës, kundër ndërtimit të një hidrocentrali dhe një fabrike uji, për të cilin banorët pretendojnë se bëhet pa konsultimin e tyre dhe me dokumente të falsifikuara.
Sipas policisë në përfundim të veprimeve hetimor është arrestuar Besnik Paci, 48 vjeç, banues në Lezhë, sipas policisë “organizatori i protestës së paligjshme”. Po ashtu janë arrestuar edhe tre të rinj aktivistë të Lëvizjes Vetëvendosje nga Kosova, Etnik Berisha, 22 vjeç, Endrit Bytyqi, 21 vjeç dhe Çlirim Gerbeshi, 22 vjeç, që morën pjesë në protestë.
“Këta shtetas, në bashkëpunim me njëri-tjetrin, kanë protestuar në mënyrë të paligjshme në afërsi të tunelit të Kalimashit, në fshatin Thirrë, Mirditë, duke bllokuar lëvizjen e mjeteve në aksin Milot-Morinë, si dhe kanë kundërshtuar me dhunë punonjësit e Policisë, duke mos iu bindur urdhrit të tyre për të zhbllokuar qarkullimin e automjeteve”, thuhet në njoftimin e policisë së Mirditës.
Zyrat e Lëvizjes Vetëvendosje në Shqipëri dhe tre kandidatët e pavarur të mbështetur nga kjo Lëvizje për zgjedhjet e 25 prillit, reaguan duke i cilësuar arrestimet dhe shoqërimet nga policia përpjekje për të frikësuar banorët.
“Veprimet e policisë sot kanë patur për qëllim intimidimin e banorëve të fshatrave Thirrë e Sang, të cilët kundërshtojnë bllokimin e Lumit të Thirrës nga HEC-i. Po ashtu, kanë targetuar edhe aktivistët e LVV nga Shqipëria e Kosova, me qëllim pengimin e veprimtarisë tonë politike në Shqipëri”, thuhet në një reagim të LVV-së.
Policia tha si akuzon të arrestuarit dhe 30 të proceduarit për veprat penale të “Organizimit dhe pjesëmarrjes në grumbullime dhe manifestime të paligjshme”, “Pengimit të qarkullimit të mjeteve të transportit” dhe “Mosbindjes ndaj urdhrit të punonjësit të Policisë së rendit publik”.
Të dielën banor të fshatrave Thirrë dhe Sang në Mirditë të mbështetur dhe nga organizata mjedisore dhe deputet e aktivist të Lëvizjes Vetëvendosje, protestuan për herë të dytë kundër ndërtimit të një HEC-i dhe Fabrike Ujit në këtë zonë. Banorët kanë bërë kallëzim penal ndaj kompanisë dhe përfaqësuesve lokalë duke pretenduar se firmat e tyre në dakordsi me ndërtimin ishin të falsifikuara. Kompania i ka mohuar akuzat. Prokuroria e Lezhës ende nuk ka dalë në një përfundim mbi çështjen.
Leja për ndërtimin e HEC-it dhe fabrikës së ujit në zonën e Thirrës është dhënë 20 qershor 2018 dhe projekti po zbatohet nga kompania “Sang 1” shpk. Ky është vetëm një prej disa dhjetëra konfliktesh të ngjashme që vijojnë prej vitesh në të gjithë vendin mes banorëve dhe kompanive e qeverive që kanë dhënë qindra leje për hidrocentrale në lumenj e përrenj.